د پاکستان له خوا د امنیتي پېښو د نه کېدو د تضمین غوښتنه رد شوه او خبرې اترې په ټپه ودرېدلې

په قطر کې د طالبانو سفیر او په استانبول کې له پاکستان سره د مذاکره کوونکي ټیم غړی سهیل شاهین ویلي، اسلام آباد له اسلامي امارت څخه د دې تضمین غوښتنه کړې وه چې د پاکستان په خاوره کې به هیڅ ډول امنیتي پېښې نه رامنځته کېږي، خو دا غوښتنه ونه منل شوه، چې دا په دې خبرو اترو د بندېدو لامل شوه.

د جمهور خبري آژانس د خبر له مخې، سهیل شاهین له بي بي سي سره په یوه مرکه کې ټینګار وکړ چې د هر هیواد د امنیت د تامین مسؤلیت د هغه هیواد پر غاړه دی.

هغه وویل: "لکه څنګه چې په افغانستان کې د امنیت مسؤلیت زموږ په اوږو دی، دا په پاکستان کې هم د دوی دی. هیڅوک دا تضمین نشي کولی چې په پاکستان کې به هیڅ ډول امنیتي پېښې رامنځته نشي. دې غوښتنې په خبرو اترو کې د بندون لامل شو."

پاکستاني چارواکو تل ادعا کړې چې تحریک طالبان پاکستان (ټي ټي پي) په افغان خاوره کې پټنځایونه لري او له دې هیواد څخه خپل بریدونه تنظیموي؛ طالبانو دا ادعاوې رد کړې دي او بې بنسټه یې بللي دي.

شاوخوا درې اونۍ وړاندې، پاکستان په کابل او پکتیکا ولایتونو کې هوايي بریدونه وکړل، چې د دواړو خواوو ترمنځ مرګونې نښتې او تاوتریخوالي ته یې لاره هواره کړه.

ترکیې او قطر د پنجشنبې په ورځ اعلان وکړ چې دواړو خواوو په استانبول کې په خبرو اترو کې د اوربند د دوام په اړه موافقه کړې ده.

د خبرو اترو بل پړاو د دې اونۍ د پنجشنبې په ورځ د تاوتریخوالي د کمولو لپاره د حل لارې موندلو لپاره ټاکل شوی دی.

جمهورخبري آژانس