په تیرو دوو اونیو کې  له بیلابیلو ولایتونو د قاچاق شویو توکو لویه اندازه کشف شوې

د طالبانو د مالیې وزارت ویاند په تیرو دوو اونیو کې د هیواد له بیلابیلو ولایتونو څخه د قاچاق شویو توکو لویه اندازه کشف شوې ده.
د جمهور خبري آژانس د خبر له مخې، د طالبانو د مالیې وزارت ویاند عبدالقیوم ناصر نن سې شنبې (د لړم ۱۳ مه) په خپله فیسبوک پاڼه لیکلي: "په تیرو دوو اونیو کې، د دې وزارت د ګمرکونو عمومي ریاست ګرځنده څارنې افسرانو د کندهار، فراه او هلمند ولایتونو په بیلابیلو سیمو کې د قاچاق وړونکو توکو یوه لویه اندازه کشف او ضبط کړه چې قاچاق وړونکي غوښتل د ګمرکي محصول له ورکړې پرته افغانستان ته قاچاق کړي.

هغه وویل چې کشف شویو توکو کې ۱۱،۱۴۷ کیلوګرامه انساني درمل، ۹۴۰ کیلوګرامه اچار، ۹،۲۲۵ کیلوګرامه خرما، ۷۷۵ کیلوګرامه پوډر شیدې، ۲۶۶ کیلوګرامه بوره او ۲۱۰۰ کڅوړې غلې دانې شاملې دي.

کشف شوي توکي او شکمن کسان د قانوني پروسس لپاره اړوندو ګمرکونو ته سپارل شوي دي.

طالبانو ټینګار وکړ چې د مالیې وزارت ګرځنده څارنې افسران په ټول هیواد کې ګرځنده څارنه ترسره کوي او هیچا ته اجازه نه ورکوي چې منع شوي او قاچاق شوي توکي انتقال کړي.

جمهورخبري آژانس