له طالبانو سره اړیکې باید د افغانستان د نړیوالو مکلفیتونو د درناوي پر بنسټ وي

د افغانستان لپاره د اروپايي ټولنې ځانګړی استازی وايي چې له طالبانو سره اړیکې باید د افغانستان د نړیوالو مکلفیتونو د درناوي پر بنسټ وي.

د جمهور خبري آژانس د خبر له مخې، د افغانستان لپاره د اروپايي ټولنې ځانګړی استازی ګیلس برټرینډ تېره شپه (د لړم ۱۸ مه) د آمو تلویزیون سره په یوه مرکه کې د طالبانو د په رسمیت پیژندلو لپاره د روسیې اقدام بې ګټې وباله او ټینګار یې وکړ چې له طالبانو سره په اړیکو کې پرمختګ باید د افغانستان د نړیوالو مکلفیتونو د درناوي پر بنسټ وي.

هغه زیاته کړه چې افغانستان لا دمخه د روم د قانون په ګډون څو نړیوال کنوانسیونونه لاسلیک کړي دي، او د سیاسي شمولیت مسلو باندې باید په هیواد کې موافقه وشي.

هغه یادونه وکړه چې طالبان د هغو کوچنیو ګامونو په اړه حساس او خوشبین دي چې ځینې هیوادونه یې د خپل رسمي مشروعیت د زیاتولو لپاره اخلي، حتی که دا اقدامات د رسمي پیژندلو معنی ونلري.

روسیې د جولای په لومړۍ نیټه په افغانستان کې طالبان د رسمي حکومت په توګه په رسمیت وپیژندل، او په نړۍ کې لومړی هیواد شو چې دا کار یې وکړ.

روسیه د طالبانو سره د مخامخ کیدو اوږده تاریخ لري. طالبان په ۲۰۰۳ کال کې په روسیه کې د ترهګریز سازمان په توګه وپیژندل شول، وروسته له هغه چې د ملګرو ملتونو د امنیت شورا لخوا د ترهګریزې ډلې په توګه لیست شو.

په هرصورت، په ۲۰۲۱ کال کې د طالبانو له واک ته رسیدو وروسته، روسیې له طالبانو سره فعاله همکاري پیل کړه.

د طالبانو او پاکستان ترمنځ د کړکیچ په اړه په دې بحث کې، برټرینډ ټینګار وکړ چې د طالبانو او پاکستان ترمنځ د کړکیچ لپاره هیڅ نظامي حل نشته او دواړه خواوې باید د دې مسلې د حل لپاره خبرو اترو ته راستانه شي.

جمهورخبري آژانس