زابل ولایت کې د کډوالو لپاره یو بل ښارګوټی پرانیستل شو

د طالبانو د کډوالو او راستنیدونکو چارو وزارت اعلان وکړ چې په زابل ولایت کې د راستنیدونکو لپاره دوهم ځانګړی ښارګوټۍ، چې«شیخ متي بابا» نومیږي، پرانستل شو.

دا استوګنځای په ۴،۳۳۰ جریبه ځمکه کې خپور شوی او د ۵،۰۰۰ راستنیدونکو کورنیو د ځای پر ځای کولو لپاره ډیزاین شوی.

د جمهور خبري آژانس د خبر له مخې، د ټاکل شوي طرزالعمل پر بنسټ، هرې مستحقې کورنۍ ته به د پنځو بسوا سره مساوي ځمکه ورکړل شي. د دې استوګنځای د پرانستلو په مراسمو کې، یو شمیر راستنیدونکو ته د ځمکې د ملکیت اسناد وویشل شول ترڅو د دوی د استوګنې پروسه ګړندۍ کړي.

د استوګنې کورونو سربیره، په دې میشتځای کې د روغتیایی مرکزونو، جوماتونو، ښوونځیو، دیني مدرسو، تفریحي پارکونو، سپورتي میدانونو، سوداګریزو مرکزونو او نورو عامه تاسیساتو جوړول هم شامل دي ترڅو د خپلو اوسیدونکو ورځني ژوند ډاډمن کړي.

دا په داسې حال کې راځي چې په وروستیو کلونو کې په سلګونو زره افغان کډوال له ګاونډیو هیوادونو، په ځانګړې توګه پاکستان او ایران څخه هیواد ته راستانه شوي دي.

د کډوالو د بیا میشتیدنې دا پروژې په داسې وخت کې ترویج کیږي چې طالبانو په ډیری ولایتونو کې د "اماراتو ځمکې" تر نامه لاندې د شخصي ځمکو په غصبولو او د پوځي اډو او نورو تاسیساتو په جوړولو سره د خلکو د ملکیت حقونه تر پښو لاندې کړي دي.

دا اسانتیاوې د راستنیدونکو یوې ځانګړې ډلې ته ځانګړې کیږي پداسې حال کې چې زرګونه نورې افغانې کورنۍ د تبعیضي پالیسیو، پراخې بې وزلۍ او د سرچینو په ویش کې د عدالت نشتوالي له امله له خپلو اساسي حقونو څخه بې برخې دي.

جمهورخبري آژانس