افغانستان په لومړۍ تمریناتي لوبه کې سکاټلنډ مات کړ

 د کرکټ د ۲۰۲۶ شل اوریز نړیوال جام د لوبو په درشل کې افغان ملي لوبډلې په لومړنۍ تمریناتي لوبه کې سکاټلنډ ملي لوبډلې ته د ۶۱ منډو په توپیر ماته ورکړه.
 
د جمهور خبري آژانس د خبر له مخې، دغه لوبه چې نن (دوشنبې د سلواغې ۱۳ مه) ماسپښين دوه بجې د هند په بنګلور کې پیل شوه، افغانستان لومړی توپوهنه وکړه او د پنځو لوبغاړو په سوځېدو سره یې په ټاکلو ۲۰ اورونو کې ۱۸۵ منډې هدف وټاکه.
 
د افغان توپوهونکو له لوري دروېش رسولي په زړه پورې لوبه وکړه، هغه د ۵ شپږیزو او ۷ څلوریزو پر مټ ۸۴ منډې وکړې.
 
ابراهیم ځدراڼ ۳۶ او محمد نبي ۳۴ منډې وکړې.
 
د سکاټلنډ پیل ښه نه وو، لوبغاړو یې د دې ستر هدف تر لاسه کولو لپاره ملګرتیا ونه شوای کولی.
 
د سکاټلنډ ټوله لوبډله په ۲۰ اور کې د ۱۲۳ منډو په کولو سره وسوځېده او دا لوبه یې د ۶۱ منډو په توپیر افغانستان ته وبایلله.
 
د یادونې ده، چې افغانستان دویمه تمریناتي سیالي له ویسټ انډیز ملي لوبډلې سره لري، چې د راتلونکې چهارشنبې په ورځ به تر سره شي.
 
جمهورخبري آژانس