طالبانو د حامد کرزي بنسټ په ګډون د ۱۶۰۰ ټولنیزو بنسټونو جوازونه لغوه کړل

د طالبانو د عدلیې وزارت اعلان وکړ چې دې ډلې د حامد کرزي بنسټ په ګډون د ۱۶۰۰ ټولنیزو، مدني، علمي، مذهبي او کلتوري بنسټونو جوازونه لغوه کړي دي.

د جمهور اژانس د خبر له مخې، د طالبانو د عدلیې وزارت تېره شپه (د سلواغې ۱۴مه) د هغو ادارو لیست خپور کړ چې جوازونه یې لغوه شوي دي.

په دې لیست کې د سید منصور نادري په مشرۍ د ناصر خسرو بلخي بنسټ، د شیعه ټولنې سره تړلي څو مذهبي بنسټونه، د سوداګریزو ښځو ټولنیزه ټولنه، د اصلاح ټولنه، او د افغان ښوونکو د ټولنې شورا شامل دي.

د حامد کرزي خیریه بنسټ، چې په ۲۰۱۵ کال کې په کابل کې پرانستل شو، هم لغوه شوی دی.

د خپل پیل په وخت کې، د بنسټ مشر حامد کرزي ویلي وو چې د بنسټ اصلي هدف د ټول افغانستان څخه د ټولو افغان ځوانانو لپاره د زده کړې چمتو کول دي.

کرزي ویلي وو چې له ځوانانو سره مرسته به په مستقیم ډول، پرته له منځګړو او پرته له کوم سیاسي انګیزې ترسره شي.

جمهورخبري آژآنس