بنټ: د ملکي وګړو وژنې اندېښمن کړی یم، نړیوال قوانین باید رعایت شي

د افغانستان د بشري حقونو لپاره د ملګرو ملتونو ځانګړي راپور ورکوونکي ریچارد بنسټ ویلي، د پاکستان او افغانستان تر منځ تازه نښته کې د ماشومانو او ولسي وګړو وژل کېدو په ژوره توګه اندېښمن کړی دی.

د جمهور خبري آژانس د خبر له مخې بنټ تیره شپه په خپله اېکس پاڼه په ټولو اړوندو اړخونو غږ کړی چې له حوصلې کار واخلي، د ولسي خلکو ساتنه وکړي او نړیوال قوانین رعایت کړي.

په افغانستان کې د ملګرو ملتونو مرستندوی پلاوي یوناما، هم له ټولو خواوو غوښتي چې د ولسې خلکو د ساتنې او د نورو زیانونو او تلفاتو د مخنیوي لپاره له دښمني لاس واخلي.

د یادونې ده، چې د پاکستان د پوځ جیټ الوتکو د یکشنبې په شپه (د کب ۲ مه) د افغانستان په پکتیکا او ننګرهار ولایتونو بمبار وکړ.

له ننګرهار تایید شوي راپورونه وايي، دلته هوايي بریدونو د بهسود ولسوالۍ د ګردي کڅ په سیمه کې د استوګنې په یوه کور شوی دي.
په دغه برید کې د شهاب الدین په نوم د یوه ۸۰ کلن سړي د کورنۍ ۱۷ غړي شهیدان شوي او ۵ نور ټپیان شوي دي.

له بریده د شهاب الدین ژوندی وتلی زوی شراکت وايي، د شپې ۱۲ بجې وې چې پر کور یې بمبار وشو او هرڅه یې ورته لوټې او له منځه یووړل.

پاکستان هم منلې چې پر افغان خاوره یې برید کړی خو ادعا یې کړې، چې برید یې د ټي ټي پي او داعش په پټنځایونو کړی دی.

طالبان د پاکستان دغه ادعا په کلکه ردوي وايي، پاکستان پر افغان خاوره تېری کړی او بې ځوابه به یې پرېنږدي.

د طالبانو دفاع وزارت وايي، په مناسب وخت کې به حساب کړی ځواب پاکستان ته ورکړي.

د طالبانو مرکزي ویاند ذبیح الله مجاهد وايي، پاکستان به بې ځوابه پاتې نه شي، خو په وینا یې دوی به د ملکي وګړو پر ځای اصلي جنایت کاران چې د پاکستان پوځیان دي په نښه کړي.

جمهورخبري آژانس