د افغانستان د شفافیت د څار اداره وايي، افغان حکومت غواړي له امریکايي شرکتونه د افغانستان کانونه استخراج تړونونه لاسلیک کړي.
د جمهور آژانس د خبر له مخې دغه ادارې نن دوشنبې د کب ۲۸ مه په کابل کې د یوې خبري غونډې پر مهال د افغان حکومت پر دغه کار نیوکه وکړه او ویې ویل، چې حکومت له دغه څه ولس تر اوسه نه دی خبر کړی.
د یادې ادارې مسوولینو و ویل، چې افغان حکومت د لویو او متوسطو کانونو د استخراج ظرفیت نه لري، خو غواړي چې له امریکا سره د کانونو د استخراج په برخه کې تړونونه وکړي.
د افغانستان د شفافیت د څار اداره ادارې مشر سید اکرام افضلي زیاته کړه، چې افغان حکومت په دې تړاو له ځینو امریکايي کمپنیو سره خبرې هم کړې او په نږدې راتلونکې کې به د دواړو لورو ترمنځ تړونونه هم لاسلیک شي.
افضلي پر حکومت نیوکه وکړه، چې له امریکا سره د کانونو د استخراج د تړونونو په اړه یې تر اوسه خلکو ته اطلاعات نه دي ورکړي، په داسې حال کې، چې دا د افغان ولس شتمني ده او حق لري چې په اړه یې پوهاوی ولري.
د افغانستان د شفافیت د څار اداره ادارې مشر سید اکرام افضلي وايي، د افغان حکومت دغه ډول کړنې د افغانانو د اندېښنې سبب ګرځي.
افضلي ټینګار وکړ، چې افغانستان اوسمهال د کانونو د استخراج تړون ته تیار نه دی او له شفافیت او اصلاحاتو پرته په دې برخه کې هر ډول اقدام د افغانانو په زیان دی.
دا په داسې حال کې ده، چې د رپوټونو له مخې د افغان حکومت یو پلاوی څو ورځې ورځې وړاندې امریکا ته تللی و او د افغانستان د کانونو د استخراج او په دې برخه کې یې پر پانګونه له یو شمېر امریکايي شرکتونو سره خبرې اترې کړې وې.
جمهورخبري آژانس:کابل
