راپورونه وايي، د پاکستان په تر ټولو لوی کراچۍ ښار کې د سختې ګرمۍ له امله تر ۶۰ زیاتو کسانو ژوند له لاسه ورکړی دی.
د جمهور آژانس د خبر له مخې په کراچۍ کې د ايدهي خیریه بنسټ مشر فېصل ايدهي ویلي د ښار په سهراب ګوټ او کورنګۍ سيمو کې دې ادارې ته تر اوسه پورې د ۶۵ تنو جسدونه راوړل شوي دي.
نوموړي زیاته کړې، چې د ښار په لانډهي، کورنګۍ او ځينو برخو کې تودوخې زیات خلک مړه کړي دي، چې ډیری د زیات عمر کسان دي.
خو د سند ایالت د روغتیا وزیر بیا دا رد کړې ده چې ګواکې په کراچۍ کې د تودو څپو له امله خلک وژل شوي دي.
په کراچۍ کې د تېرې يکشنبې له ورځې د تودوخې درجه لوړه شوې او د دغه هېواد د هوا پېژندنې ادارې مسولینو ویلي چې، د هوا ګرمښت به تر جمعې ورځې دوام ولري.
باید و ویل شي، چې په ۲۰۱۵ میلادي کال کې هم په کراچۍ ښار کې د هوا ګرموالي شااوخوا ۱۲۰۰ کسان مړه او سلګونه نور ناروغه کړي وو.
جمهورخبري آژانس:کابل
