امنیتي چارواکي وايي، ناپېژانده وسله والو کسانو په هرات ولایت کې یو تن دیني عالم جعفر توکلي په ډزو وژلی دی.

د جمهور آژانس د خبر له مخې دغه پېښه تېره شپه د هرات ښار د ۶۴ سړک په سیمه کې رامنځ ته شوې ده.

د هرات د امنیه قوماندانۍ د امنیت امر امین الله امین وايي، دوه تنه موټر سپرو وسله والو پر دیني عالم جعفر توکلي د هغه د کور مخې ته ډزې کړې او وژلی یې دی.

نوموړي زیاته کړې، چې برید کوونکي له سیمې په تېښته بریالي شوي، خو پولیس یې د نیولو په لټه کې دي.

باید و ویل شي، چې جعفر توکلي هرات ولایت کې یو له وتلو دیني عالمانو او د حکمت په نوم د یوې سیمه ییزې رادیو بنسټګر او مشر هم وو.

تر اوسه د دغه دیني عالم د وژنې مسؤولیت چا پر غاړه نه دی اخیستی.

جمهورخبري آژانس:هرات