سیمه ییز چارواکي وايي، میدان وردګو ولایت کې دوه بهرني سرتېري وژل شوي او بهرنیو ځواکونو پر یوه لېسه هوايي برید کړی دی.

د جمهور آژانس د خبر له مخې د میدان وردګو د والي ویاند عبدالرحمن منګل د پېښې د پخلي تر څنګ زیاتوي، چې دغه پېښه د میدان اړوند په زیولات سیمه کې رامنځ ته شوې ده.

نوموړي زیاته کړه، چې د زیولات په سیمه کې د زراعت له مسلکي لېسې پر بهرنیو ځواکونو ډزې شوې، چې په کې دوه بهرني سرتېري وژل شوي دي.

دی وايي تر دې وروسته بهرنیو ځواکونو په یاده لېسه هوايي برید کړی، چې په ترڅ کې یې ګڼ شمېر وسله والو طالبانو ته مرګ ژوبله اوښتې ده.

په دغه برید کې د لېسې ودانۍ له منځه تللې، خو د طالبانو د مرګ ژوبلې کره شمېره نه ده معلومه شوې.

د والي ویاند په دې اړه نور جزیات نه دي ورکړي، چې آیا په دې لېسه کې زده کوونکي هم وو که نه.

وسله والوطابانو هم په دې اړه څه نه دي ویلي.

جمهورخبري آژانس:میدان وردګ