د کورنیو چارو وزارت د نشه يي توکو د قاچاق په تور د ۷۴ تنو د نیولو خبر ورکړی دی.
د جمهور آژانس د خبر له مخې یاد وزارت نن یکشنبې د تلې لومړي نېټه په خپره کړې خبرپاڼه کې ویلي، دغه کسان په تېره یوه اوونۍ کې د هېواد په بېلا بېلو برخو کې نیول شوي دي.
په خبرپاڼه کې راغلي، د نشه يي توکو پر وړاندې د مبارزې ځانګړو پولیسو د نشه يي توکو د قاچاق د مخنیوي په موخه ۶۳ عملیات تر سره کړي دي.
سرچینه زیاتوي، چې په دغه عملیاتو کې ۷۴ تنه قاچاق کوونکي، ۳۳۸ کیلوګرامه نشه يي توکي، ۱۴۰ کیلوګرامه کیمیاوي مواد، ۷ عرادې موټر، ۸ میله ډول ډول وسلې نیولي دي.
د کورنیو چارو وزارت وايي، نیول شوي کسان د زیاتو پلټنو له پاره عدلي او قضايي ارګانونو ته سپارل شوي دي.
جمهورخبري آژانس:کابل
