د امریکا د بهرنیو چارو وزارت یو ځل بیا پر هند او پاکستان غږ کړی، چې د کشمیر په اړه یو د بل پر وړاندې له زغم څخه کار واخلي.
د جمهور آژانس د خبر له مخې دغه وزارت په کشمیر کې وضعیت ترینګلی بللی او ویلي یې دي امریکا هر څه له نېږدې څاري.
د امریکا د بهرنیو چارو وزارت یو ځل بیا پر دواړو لورو غږ کړی چې زغم ولري او له پاروونکو اقداماتو ډډه وکړي.
دغه وزارت ټینګار کړي، چې امریکا د دې ملاتړې ده چې دواړه هېوادونه د کشمیر پر مسئله مخامخ او مستقیمې خبرې پيل کړي.
د یادونې ده، چې په دې وروستیو ورځو کې د هند او پاکستان ترمنځ د کشمیر پر مسئله ناندرۍ اوج ته رسېدلې دي.
هند پولې ته سلګونه پوځیان لېږلي او دغه راز یې د هندي کشمیر ورکړل شوي اختیارات لغوه اعلان کړي، خو پاکستان یې په مقابل کې خپل سفیر له ډیلي راغوښتی او د هند هغه ته یې د وتلو امر کړی.
د پاکستان د ملي امنیت کمېتې په پرون غونده کې له هند سره د دیپلوماتیکو او اقتصادي اړیکو د ځنډولو پرېکړه هم کړې ده.
جمهورخبري آژانس:کابل
