افغان حکومت هم د کرونا ویروس د خورېدو د مخنیوي په خاطر هېواد کې ټول دولتي او خصوصي تعلیمي او تحصیلي مرکزونه تړلي دي.
د جمهور آژانس د خبر له مخې په سراتېرژیکو چارو کې د ولسمشر سلاکار وحید عمر وايي، دا اقدام د عامې روغتیا، پوهنې، لوړو زده کړو او اطلاعاتو او کلتور وزارتونو په وړاندیز او د ولسمشر غني په منظورۍ اخستل شوی دی.
هغه په خپل ټوېټر لیکلي«د افغانستان د عامي روغتیا، معارف، لوړو زده کړو او اطلاعاتو او فرهنګ وزارت د ګډ وړاندیز په اساس او د ولسمشر غني له منظورۍ وروسته، ټول دولتي او خصوصي تعلیمي موسسات به د وري/حمل تر ۳۱ ( اپریل ۱۹) پورې تړلي وي.»
افغان حکومت دا اقدام داسې مهال کوي چې په دغه هېواد کې د کرونا پېښې ۱۶ ته رسېدلي دي.
د یادونې ده، چې افغان حکومت نه یوازې تعلیمي او تحصیلي بنسټونه د یوې میاشتې لپاره بند کړي، بلکې د نوي کال جشن او ټول ورزشي لوبې یې هم لغوه کړې دي.
جمهورخبري آژانس:کابل
