د ناټو عمومي سرمنشي ینس یو ځل بیا ټينګار کړي، چې طالبان په هېڅ صورت د جګړو له لارې موخو ته نه شي رسېدلی.
د جمهور آژانس د خبر له مخې ښاغلي سټولټنبرګ په تازه څرګندونو کې ویلي، افغان جګړه یوازې د خبرو له لارې د پای ته رسېدو وړ ده.
نوموړي ویلي، طالبان باید په دې باوري شي، چې د جګړو له لارې بریا ته نه شي رسېدلی نو ښه به دا وي، چې سولې ته غاړه کېږي.
دی وايي، سولې ته د رسېدو ښه لار دا ده، چې ناټو د افغان ځواکونو ملاتړ ته ادامه ورکړي او د دغه پوځ په روزنه کې له خپلو ټولو امکاناتو استفاده وکړي.
د ناټو سرمنشي یو ځل بیا ټینګار کړي، چې طالبان باید په دې پوه شي چې د سولې او له افغان حکومت سره د مخامخ خبرو له لارې موخو ته رسېدلی شي.
سټولټنبرګ همدا راز پر طالبانو دا غږ هم کړی چې له امریکا سره د سولې شوې هوکړې ته درناوی وکړي او تاوتریخوالی راکم کړي.
هغه دا هم زیاته کړې چې د سولې هوکړه او د سولې په برخه کې هر اقدام د ناټو له ملاتړ برخمن دی او د هوکړې له مخې د خپلو ځواکونو کمولو ته هم ژمن دي.
جمهورخبري آژانس:کابل
