د کورنیو چارو وزارت وايي، په تېرو دوه اونیو کې د طالبانو له خوا په بریدونو کې ۲۲۱ ملکي وګړو ته مرګ ژوبله اړولې ده.

د جمهور آژانس د خبر له مخې د دغه وزارت ویاند طارق ارین زیاتوي، طالبانو په تېرو دوه اونیو کې ۷۸۱ ترهګریز فعالیتونه تر سره کړي دي.

نوموړي زیاته کړه، چې د دغه ترهګریزه فعالتیونو په پایله کې ۸۸ ملکي وګړي وژل شوي او ۱۳۳ نور ټپیان شوي دي.

د کورنیو چارو وزارت ویاند په خبره طالبانو دغه بریدونه د هېواد په ۲۷ ولایتونو کې تر سره کړي، چې تر ټولو ډېره مرګ ژوبله یې په کندهار او غزني ولایتونو کې ملکیانو ته اړولې.

وسله والو طالبانو تر اوسه په دې اړه غبرګون نه دی ښودلی.

دا په داسې حال کې ده، چې یوازې پرون د بلخ ولایت په بلخ ولسوالۍ کې د طالبانو په یوه موتر بم برید کې څو تنه ملکي وګړي و وژل شول او له ۴۰ زیات ټپیان شوي دي.

جمهورخبري آژانس:کابل