په دوحه کې د افغان حکومت او طالبانو د مرکچي پلاویو تر منځ د مذاکراتو پر کړنلارې د توافق سره سم کابل کې د اروپايي ټولنې سفیرانو افغانستان کې د بېړني او بشپړ اوربند غوښتنه وکړه.
د
جمهور خبري آژانس د خبر له مخې دغه سفیرانو پرون چهارشنبې د لیندۍ ۱۲ مه له ولسمشر غني سره لیدلي او د جینوا کنفرانس د ژمنو پر عملي کېدو او سولې پروسې یې خبرې کړې دي.
د اروپايي تولنې سفیرانو د سولې په برخه کې د افغان حکومت هېڅې وستایلې او ویې ویل، چې دغه هڅې باید د اساسي مذاکراتو لپاره لار هواره کړي.
دوی د سولې په خبرو کې د پرمختګ لپاره بېړنۍ اوربند مهم او اړین وباله او دغه راز یې ملي روغې جوړې په عالي شورا کې وروستي پرمختګونه هم وستایل.
بل خوا ولسمشر غني پرون د افغانستان لپاره د ناټو له ملکي سفیر پونټه کورو سره هم لیدلي او د سولې د وروستیو پرمختګونو په اړه یې ورسره خبرې کړې دي.
د ارګ خبرپاڼه وايي، په دغه لیدنه کې له افغان ځواکونو د ناټو پر ملاتړ او دغه راز د جینوا کنفرانس په اړه هم خبرې اترې وشوې.
دا په داسې حال کې ده، چې پرون په دوه کې د بین الافغاني مذاکراتو د پلاویو تر منځ د مذاکراتو په کړنلاره توافق شوی او دواړو لورو په خبرو کې د پرمختګ څرګندونې کړې دي.
د افغان حکومت او طالبانو پلاویو تر توافق وروسته په ګډه اعلامیه کې ویلي، ګډې کاري کمېټې ته یې دنده سپارلې، چې د اجنډا موضوعات ترتیب کړی تر چې خبرې پیل شي.
جمهورخبري آژانس:کابل