سیمه ییز امنیتي چارواکي تاییدوي، چې ننګرهار ولایت کې د پولیسو په رنجر موټر چاودنه شوې او درې تنه په کې ټپیان شوي دي.
د جمهور آژانس د خبر له مخې چاودنه نن شنبې د سلواغې ۱۸ مه د ننګرهار مرکز جلال آباد ښار د بهسودو پله ته څېرمه د هوټلونو په سیمه کې شوې ده.
د ننګرهار د امنیه قوماندانۍ مطبوعاتي دفتر په یوه خبرپاڼه کې ویلي، چاودنه د قوماندانۍ د پولیسو په رنجر موټر شوې ده.
سرچینه زیاتوي، چې په دغه چاودنه کې درې پولیس ټپیان شوي دي، خو په اړه یې نور جزیات نه دي ورکړي.
تر اوسه د دغه چاودنې مسوولیت چا نه دی اخیستی.
دا په داسې حال کې ده، چې همدا نن د ننګرهار په سره رود ولسوالۍ کې ملي امنیت ځواکونو هغه مقناطسي ماین کشف او شنډ کړ، چې د ناوې او زوم په موټر پسې نښلول شوی وو.
د یادونې ده، چې په دې وروستیو کې د کابل په ګډون په ننګرهار او کندهار ولایتونو کې مقناطسي ماین چاودنې او هدفي وژنې ډېرې شوې دي.
جمهورخبري آژانس:کابل
