کابل کې د چین سفیر وانګ یو وايي، هېواد یې چمتو دی، چې د افغان سولې پروسې سره خپلې بشپړې همکاري ته دوام ورکړي.
د
جمهور خبري آژانس د خبر له مخې یو دغه څرګندونې د افغانستان د بهرنیو چارو وزیر محمد حنیف اتمر سره په لیدنه کې کړې دي.
د بهرنیو چارو وزارت وايي، په دغه لیدنه کې چین له افغانستان سره د اقتصادي او امنیتي اړیکو پر پراختیا ټینګار کړی دی.
د وزارت په خبرپاڼه کې ویل شوي په دغه ناسته کې دواړو لوریو د ترکیې پر راتلونکي کنفرانس یې چې ټاکل شوې د روانې اپریل میاشتې په ۱۶ په استانبول کې جوړ شي خبرې کړي.
د چین د سفیر وانګ ټینګار کړي، چې افغان جګړه یوازې د خبرو له لارې ختمېدلی شي او دوی له افغان سولې سره بشپړې همکارۍ ته ادامه ورکوي.
په ورته وخت ښاغلي اتمر ویلي، له افغان سولې سره د چین همکاري مهمه ده او چین کولی شي چې د سولې په تړاو سیمه ییزه اجماع پیاوړې کړي.
د بهرنیو چارو وزیر ټینګار کړی چې افغانستان ته د سولې راتګ د ټولې سیمې په ګټه دی او دلته به د دایمي ثبات او اقتصادي ودې سبب شي.
د یادونې ده، چې ښاغلي اتمر کابل کې د امریکا له شارژدافیر راس ویلسن سره هم د سولې پروسې او د ترکیې پر ناسته خبرې کړې دي.
جمهورخبري آژانس:کابل