پاکستان له دغه هېواد څخه د افغانستان د سفیر او لوړ پوړو دیپلوماتانو ایستلو په اړه د افغان حکومت پر تصمیم خپګان ښودلی او دا یې د تاسف وړ کار بللی دی.
د
جمهور خبري آژانس د خبر له مخې د پاکستان د بهرنیو چارو وزارت په یوه خبرپانه کې ویلي، له پاکستانه د سفیر او لوړ پوړو دیپلوماتانو د ایستلو په اړه د افغانستان د حکومت تصمیم د خپګان او تاسف وړ دی.
خبرپانه کې راغلي، چې په اسلام آباد کې د افغانستان د سفیر په لور برید او تښتونه پلټل شوې او د پاکستان د صدراعظم د هدایت په اساس په لوړه کچه تعقیبیږي.
سرچینې زیاته کړې، چې پاکستان کې د افغانستان د سفیر، د هغه د کورنۍ او د سفارت د کارکوونکو امنیت نور هم جدي نیول شوی.
اعلامیه وایي: «مونږ هیله من یو چې د افغانستان حکومت په خپل نصمیم بیا غور وکړي.»
خبرپانه وايي، د پاکستان د بهرنیو چارو سکرتر پرون د افغانستان د سفیر سره کتلي او د حکومت د ټولو اقداماتو په اړه یې ورته وضاحت ورکړی اوورته یې د بشپړه همکارۍ ډاډ ورکړی.
په اسلام اباد کې پولیس وايي نا معلومه کسانو د افغانستان د سفیر لور د جمعې په ورځ وتښتوله او له شاوخوا پنځو ساعتونو اختطاف او شنکجې وروسته یې بېرته خوشې کړې ده.
دغه کار په افغانستان کې سخت غبرګونونه راوپارول، افغان حکومت د پاکستان سفیر احضار کړ او له اسلام آباد یې خپل سفیر او دیپلوماتان راوغوښتل.
په ټولنیزو رسنیو کې ډېرو افغانانو د افغانستان د سفیر د لور اختطاف کول غندلي او پاکستان یې د افغان دپلوماتانو او د هغوی د کورنیو د امنیت په ساتنې کې ناکام بللی دی.
په همدې حال په کابل او جلال اباد کې د افغانستان د سفیر د لور د اختطاف په ضد لاریونونه وکړل.
جمهورخبري آژانس:کابل