د امریکا د بهرنیو چارو وزیر انتوني بلېنکن وايي، امریکا به له طالبانو سره خپل ټول ارتباطي چینلونه فعال وساتي.
د جمهور آژانس د خبر له مخې بلېنکن دغه څرګندونې قطر ته تر سفر مخکې واشنګټن کې خبریالانو ته وکړې.
ټاکل شوې د امریکا د بهرنیو چارو وزر انتوني بلېنکن او دفاع وزیر لوید آشټن نن یکشنبې د وږي ۱۴ مه قطر ته ولاړ شي او هلته له قطري او افغان چارواکو سره د افغانستان په اړه خبرې وکړي.
قطر ته تر روانېدو مخکې بلېنکن خبریالانو ته ویلي، دوی له طالبانو سره ټول ارتباطي چینلونه فعال ساتي، خو په وینا یې د حکومت په رسمیت پېژندلو لپاره یې بېړه نه لري.
بلېنکن وايي، دغه ډلې سره د خبرو او په افغانستان کې د وضعیت د ښه کېدو لپاره قطر او ځینو نورو هېوادونو ته سفر کوي څو وضعیت کنټرول او د کډوالو حالت له نږدې وکتل شي.
ټاکل شوې چې بلینکن نن قطر او تر هغه وروسته جرمني ته سفرونه وکړي.
نوموړی به ددواړو هېوادونو له چارواکو سره د لیدنې تر څنګ په دې دواړو هېوادونو کې له افغانستان د تازه وتلو کډوالو کمپونو ته ورشي او ستونزې به یې واوري.
د یادونې ده، چې طالبانو هم ویلي، دوی د امریکا په ګډون د نړۍ له ټولو هېوادونو سره د ښو او پر دوه اړخیزو ګټو ولاړو اړیکو ته لومړیتوب ورکوي.
جمهورخبري آژانس:کابل
