د چین د بهرنیو چارو وزیر وانګ يي له کابل څخه ډهلی ته تللی او د هند د بهرنیو چارو وزیر اېس جي شنکر سره یې د افغانستان په اړه خبرې اترې کړې دي.
د جمهور آژانس د خبر له مخې د چین د بهرنیو چارو وزارت وايي، پکېنګ او ډهلی د سیمه ییزو او نړیوالو مهمو مسایلو په اړه ورته دریځونه لري.
د چین د بهرنیو چارو وزیر له خپل هندي سره سره لیدنه کې د چین او هند تر منځ د اړیکو د پراختیا غوښتنه او ټینګار یې کړي، چې د سیمې وضعیت ته په کتو باید یو له بله ملاتړ وکړي.
په دغه لیدنه کې د افغانستان په اړه هم خبرې اترې شوې دي، خو نور جزیات یې نه دي ورکړي.
د چین د بهرنیو چارو وزیر پر داسې مهال هند ته سفر کوي، چې ټاکل شوې د روانې میاشتې پای کې د افغانستان په اړه چین کې د سیمې د هېوادونو یو کنفرانس جوړ شي.
په دغه کنفرانس کې د افغانستان د اسلامي امارت استازو ته هم بلنه ورکړل شوې ده.
دا چې د وانګ يي د سفر په ترڅ کې هند ته په دغه غونډه کې د ګډون بلنه شوې که نه جزیات نشته، خو له وانګ يي سره تر لیدنې وړاندې جي شنکر په یوه خبري کنفرانس کې ویلي، چې د افغانستان په اړه چین کې جوړېدونکي کنفرانس کې دوی ته د ګډون بلنه نه ده ورکړل شوې.
جمهورخبري آژانس:کابل
