د مالیې وزارت له هېواده بهر په قانوني او غیر قانوني لارو د غنمو پر صادراتو کلک بندیز لګولی دی.
د
جمهور خبري آژانس د خبر له مخې د مالیې وزارت لخوا په یوه خپره شوې خبرپاڼه کې راغلي، چې د مالیې وزیر ملا هدایت الله بدري د ټولو ګمرکاتو مسئولينو ته هدايت کړی، چي له دې وروسته هېچاته اجازه ورنه کړي چي يوه دانه غنم له هېواده د باندې په قانوني او يا په غير قانوني توګه صادر کړي.
دا په داسې حال کې ده، چې د هېواد په ګرمو سیمو کې د غنمو حاصلات رارسېدلي دي او ویل کیږي چې یو شمیر کسان یې پاکستان ته په غیر قانوني توګه صادروي.
بلخوا د هېواد په ځينو ولایتونو کې په وروستیو دوو میاشتو کې د غنمو بیه نږدې نیمايي لوړه شوې چې خلک یې اندېښمن کړي دي.
خلک او کروندګر، د غنمو د بیې د لوړوالي لاملونه د دغه بوټي کم کښت او پر ځای یې د کوکنارو کرل، د اوبو کمښت، وچکالي او نور ګڼي.
جمهورخبري آژانس:کابل