چینایي سوداګر افغانستان کې د سړکونو جوړولو برخه کې پانګونه کوي

دوو چینایي سوداګرو د ریاست الوزراء سیاسي مرستیال سره په لیدنه کې، په اساسي ډول د سړکونو او لويو لارو جوړولو برخو کې پانګونې ته لېوالتیا ښودلې ده.

د ریاست الوزرا سیاسي مرستیال پرون په سپېدار ماڼۍ کې له دوو چینايي سوداګرو کانسټنټ رۍ او مسټر وو سره وکتل.

دغو سوداګرو په افغانستان کې د امنيت په ټينګښت خوښي وښوده او په بېلابېلو برخو کې د پانګونې زمينې مساعدېدو ته په اشارې له افغانستان سره په اقتصادي برخه کې د همکاريو دوام ته چمتووالی څرګند کړ.

هغوی زیاته کړه، اوس چې پراخ کاري ظرفیت او زمینه مساعده ده؛ نو د طالبانو په همکارۍ چینايي شرکتونه او سوداګر غواړي د بیارغونې په ځانګړې توګه په اساسي ډول د سړکونو او لويو لارو جوړولو برخو کې پانګونه وکړي.

د ریاست الوزرا سیاسي مرستیال دغو سوداګرو سره په لیدنه کې وويل، اسلامي امارت پانګه والو ته د لازمو اسانتياوو رامنځته کولو ته ژمن دی.

جمهورخبري آژانس