د طالبانو تر واکمنۍ لاندې د ښځو سوداګري له جدي خنډونو سره مخ ده

د طالبانو تر واکمنۍ لاندې د ښځو سوداګري له جدي خنډونو سره مخ ده
د ملګرو ملتونو پراختیايي پروګرام ښيي چې په افغانستان کې ښځینه متشبثې د سوداګرۍ کولو پر مهال له خنډونو او لګښتونو سره مخ دي.

دغه سازمان چهارشنبې د وري ۲۹ مه د دې څېړنې د پایلو په خپرولو سره ویلي، په افغانستان کې د ښځو د کار پر وړاندې له سترو ننګونو او محدودیتونو سره سره، په هېواد کې د ښځو تر مالکیت او مدیریت لاندې کاروبارونه د اقتصاد د بنسټیزو بنسټونو په توګه فعالیت کوي. 

په دې څېړنه کې په تېرو درېیو کلونو کې د سوداګرۍ په برخه کې د افغان مېرمنو فعالیت ارزول شوی دی.

د اسيا او ارام سمندر لپاره د ملګرو ملتونو د پراختيايي پروګرام سيمه ييز مشر، کاني ويګناراجا وويل: "ښځينه سوداګرو په ډېرو سختو شرايطو کې د نه منلو وړ زړورتيا او وسايل ښودلي دي."

په راپور کې راغلي چې د افغان ښځینه متشبثینو په وړاندې د تبعیض او کاري محدودیتونو او همدارنګه خورا کمزوري مالي سیسټم له دریو زرو څخه د سروې شویو میرمنو څخه 41٪ پور ته اړ کړي دي.

شاوخوا درې پر څلورمه برخه ځواب ویونکو وویل چې دوی د تګ راتګ له سختو محدودیتونو سره مخ دي، په شمول له محرم پرته محلي بازارونو ته د تګ ناشوني.

د UNDP د څیړنو پر بنسټ، په افغانستان کې یوازې پنځه سلنه ښځینه متشبثینو له بانکونو او کوچنیو مالي موسسو څخه پورونه اخیستي دي.
د دغې څېړنې د موندنو له مخې، په ټولیز ډول ۱۵،۸ میلیونه افغانان د خوراکي توکو له خوندیتوب سره مخ دي او د ښځو د کار موندنې کچه شپږ سلنې ته رسېدلې ده.

د دغه سازمان د معلوماتو له مخې، دغه بنسټ د خپلو همکارانو په همکارۍ په افغانستان کې له ۷۵ زره کوچنیو سوداګرو ملاتړ کړی او ۹۰۰ زرو ټنو ته یې کاري فرصتونه رامنځته کړي دي.

په افغانستان کې د UNDP استازې سټیفن روډریګز وویل، "ښځې له اوږدې مودې راهیسې په افغانستان کې د کورنیو د هوساینې تر شا د محرک ځواک رول لري او د سیمه ییز اقتصاد په ساتلو کې مهم رول لوبوي."

هغه ټینګار وکړ، چې دغه بنسټ به د افغان مېرمنو غږ پورته کولو ته دوام ورکړي او پر ښځو به پانګونه زیاته کړي.

دا په داسې حال کې ده، چې طالبانو د افغانستان تر واک لاندې راوستو وروسته د نجونو او ښځو پر زده کړو، زده کړو، کار او تګ راتګ بندیز ولګاوه.

جمهورخبري آژانس