طالبانو او پاکستان د دواړو هېوادونو پر پوله پر اوربند هوکړه وکړه

"بزنس ریکارډر" د خپلو باخبرو سرچینو په حواله خبر ورکړی، چې د افغان طالبانو او پاکستاني حکومت پلاوي د دواړو هېوادونو پر پوله د اوربند او د جګړې د پای ته رسولو په اړه هوکړې ته رسېدلي دي.

د دغه راپور پر بنسټ، دغه هوکړه د پولې د دواړو غاړو د مشرانو او د پاکستاني او طالب چارواکو تر کتنې وروسته شوې ده.

په راپور کې راغلي چې د پاکستاني ځواکونو او طالبانو ترمنځ د سرحدي نښتو اصلي لامل د دې ډلې د سیمه ییزو چارواکو او د سرحدي سیمو د ځینو اوسېدونکو له خوا له تحریک طالبان پاکستان (ټي ټي پي) سره د ملاتړ او د هغوی د جوړیدو هڅې دي. د هیواد د پوځ لخوا په سرحدي نقطو کې دیوال.

د راپور له مخې، د پولې دواړو غاړو قومي مشرانو په درې ماده ييز پرېکړه ليک کې ويلي، چې د پکتيا په ډنډ پټان ولسوالۍ کې دې د خرلاچي لاره د ټولو موټرو پر مخ پرانيستل شي.

په خرلاچي کې د افغان او پاکستاني سوداګرو پر وړاندې د شته ننګونو د څېړلو لپاره د یوې کمېټې جوړول د دغه هوکړه لیک له نورو مادو څخه دي.

جنرال شهزاد عظيم چې په دې غونډه کې يې د پاکستاني پلاوي مشري کوله، د طالبانو پلاوي ته وويل چې دغه هېواد به د سرحدي ديوال د جوړولو کار بشپړ کړي.

عظيم د طالبانو سرحدي چارواکي د پاکستان د تحريک طالبان په ملاتړ تورن کړي دي.

هغه زیاته کړه، موږ له افغانستان سره په جګړه کې نه یو، بلکې له ټي ټي پي سره په ښکاره جګړه کې یو، له شاوخوا یوې میاشتې راهیسې په سپین‌شګاه او تریمنګل سیمو کې د پاکستاني پوځیانو پر پوستو بریدونه کېږي او طالبان زموږ غوښتنو ته ځواب نه وايي. "

له بلې خوا د طالبانو یوه سرحدي چارواکي شیرمحمد په دې غونډه کې یادونه وکړه چې تر هغو به سرحدي تاوتریخوالی دوام ولري څو چې پاکستان له TTP سره خپله ستونزه هواره نه کړي.

هغه ټینګار وکړ چې "موږ په اسلام اباد کې ستاسو مشرانو ته هم ویلي چې تاسو باید له تحریک طالبان پاکستان سره کېني او خبرې اترې وکړئ او تر څو چې ټي ټي پي شتون ولري، د پاکستان او افغانستان تر منځ دا کړکېچ به دوام ولري."

په همدې حال کې په پکتیا او خوست ولایتونو کې د طالبانو او پاکستاني پوله ساتو ترمنځ څو ځلې نښتې شوي دي.

جمهورخبري آژانس