په بامیان کې سیلاب ۶۰ څاروي له منځه ولاړي

په بامیان ولایت کې د سیلابونو په پایله کې ۶۰ څاروي له منځه تللي او څه باندې ۲۰۰ جریبه کرنیزه ځمکه ویجاړه شوې ده.

په باميانو کې سيمه ييزو سرچينو ويلي، چې دغه سېلاب د جمعې په ورځ د جوزا په ٢٥مه، له سختو اورښتونو وروسته له مرکز څخه د ګلستان او د سيغان ولسوالۍ د "قطرسام" په کليو کې راغلى دى.

د سرچينې د معلوماتو له مخې، په دغه سېلاب کې شپږ کيلومتره کرنيزه ځمکه او ٢٦ کيلومتره سړکونه هم ويجاړ شوي دي.

دغه راز ويل شوي دي چې ددغه سيلاب له امله له لسو څخه زيات د استوګنې کورونه په جزوي توګه ويجاړ شوي دي .

دا په داسې حال کې ده، چې د سږ کال پسرلني سېلابونو د هېواد د مرکزي، شمال، شمال ختيځ او شمال لوېديځو ولايتونو اوسېدونکو ته په ځانګړې توګه ډېر زيانونه او زيانونه اړولي دي.

جمهورخبري آژانس