پر پاکستان د هند توغندیز برید، د اسلام آباد سخت غبرګون

هند د پاکستان په خاوره کې په دریو ځایونو کې د بالستیک توغندیو په ویشتلو سره په نیمه وچه کې تاوتریخوالی زیات کړ. د پاکستان پوځ د چټک پوځي ځواب اعلان وکړ او ادعا یې وکړه چې هندي جنګي الوتکې یې ویشتلې دي.

د جمهور اژانس د راپور له مخې، یو ساعت وړاندې، هند د پاکستان په خاوره کې د بهاولپور، مظفرآباد او کوټلي په ګډون درې سیمې په نښه کولو لپاره بالستیک توغندي وکارول.

د هند پوځ دا بریدونه د سیندور عملیاتو یوه برخه وبلله او ادعا یې وکړه چې په پاکستان او د هند تر کنټرول لاندې کشمیر کې یې "ترهګریز بنسټونه" په ډیر دقت سره ویجاړ کړي دي.

د هند حکومت په یوه بیان کې زیاته کړه چې په دې سیمو کې نهه ځایونه بمبار شوي او دا عملیات "په نښه شوي، قصدي او غیر یرغلګر" وو. د هند پوځ ټینګار وکړ چې د پاکستان هیڅ پوځي تاسیسات په نښه نه شول او د اهدافو په ټاکلو کې "د پام وړ زغم" ښودل شوی دی.

برعکس، پاکستان دا بریدونه "بې دلیله یرغل" او په قصدي ډول د ملکي وګړو په نښه کول وبلل.

د پاکستان د پوځ یوه ویاند اعلان وکړ چې په پنجاب ایالت کې په یوه برید کې یو ماشوم وژل شوی او دوه نور ټپیان شوي دي.

په ورته وخت کې، الجزیرې د پاکستاني چارواکو په حواله راپور ورکړی چې په دې بریدونو کې تر اوسه پورې ۳ کسان وژل شوي او ۱۲ نور ټپیان شوي دي.

د پاکستان د دفاع وزیر خواجه اصف د هند دا ادعا چې د ترهګرو کمپونه په نښه کوي "دروغ" وبلله او ویې ویل: "هند په قصدي ډول ملکي وګړي په نښه کړي او حتی خلکو ته یې د وتلو فرصت هم نه دی ورکړی." "که دوی جرئت ولري، نو په میدان کې دې زموږ سره مخامخ شي."

په عین حال کې، د پاکستان پوځ د هوايي ځواک په ګډون د ځوابي برید پیل اعلان کړ. په دغه هېواد کې چارواکي وايي چې د هند یوه رافیل جنګي الوتکه د پنجاب ایالت په سر ویشتل شوې ده.

پاکستاني ټلویزیون هم د امنیتي سرچینو په حواله ادعا کړې چې دوه هندي جنګي الوتکې یې ویشتل شوې دي.

د پاکستان صدراعظم شهباز شریف هم په یوه کلکه اعلامیه کې وویل: "پاکستان د دې تحمیل شوي جنګ عمل ته د ځواب ویلو بشپړ حق لري او په قاطع ډول به ځواب ووایی."د پاکستان ملت د خپل پوځ تر څنګ ولاړ دی او دښمن ته به اجازه ورنکړي چې خپل خیانت کوونکي اهداف ترلاسه کړي."

د خبري سرچینو په وینا، په پاکستان کې ټولې الوتنې لغوه شوي او د هیواد هوايي حریم د ۴۸ ساعتونو لپاره تړل شوی دی.

جمهورخبري آژانس