ایراني چارواکي: طالبان د ځینو افغان کډوالو منلو څخه انکار کوي

ایراني رسنیو د هیواد د سوداګرۍ او کار پراختیا مرستیال وزیر په حواله راپور ورکړی چې طالبانو د ځینو افغان کډوالو منلو څخه انکار کړی.

د جمهور خبري آژانس د خبر له مخې ایراني رسنیو د سوداګرۍ او کار پراختیا مرستیال وزیر ملک حسیني په حواله راپور ورکړی چې طالب چارواکو د ځینو هغو کډوالو منلو څخه انکار کړی چې له ایران څخه راستانه شوي دي.

هغه وویل چې دا خلک هیڅ ډول هویت اسناد نلري او طالبان وايي چې دوی نشي کولی ثابته کړي چې دا خلک په حقیقت کې افغان اتباع دي.

ایراني چارواکي وویل چې د افغان اتباعو د وتلو په برخه کې زموږ یوه جدي ننګونه د ځینو خلکو په منلو کې د طالبانو د همکارۍ نشتوالی دی. دوی پوښتنه کوي چې موږ څنګه پوهیږو چې دا کس افغان دی؟

حسیني زیاته کړه چې رسمي احصایې ښیې چې په ایران کې د بهرني کارګر ځواک له 92 سلنې څخه ډیر له افغانستان څخه دی.

همدارنګه، د غیر رسمي اټکلونو له مخې، شاوخوا 5 ملیون افغانان په غیرقانوني ډول د ایران د کار بازار کې فعال دي، چې 70 سلنه یې مجرد دي.

جمهورخبري آژانس