د طالبانو د کډوالو او راستنېدونکو چارو وزارت په یوه خبر پاڼه کې ویلي، چې د دغه وزارت سرپرست وزیر مولوي عبدالکبیر د اطلاعاتو او کلتور وزارت د ځوانانو چارو له معین محمد یونس راشد سره کتلي دي.

د جمهور آژانس د خبر له مخې په دې کتنه کې د ځوانانو چارو د معینیت د فعالیتونو بیانولو پر مهال ویلي چې په کابل او ولایتونو کې د ځوانانو لپاره بېلابېلې اصلاحي او د روزنیزې برنامې تر کار لاندې دي او تمه ده، چې په هر ولایت کې ګڼ شمېر ځوانان په کې برخه واخلي.

د هغه په خبره د ځوانانو چارو معینیت به د کډوالو او راستنېدونکو چارو وزارت په همکارۍ او همغږۍ، له ګاونډیو هېوادونو څخه راستنو شویو افغان ځوانانو ته یو لړ ځانګړې برنامې طرحه پلې کړي، څو په ټولنه کې د ځوانانو په ادغام کې مرسته وکړي او مسایل ورته روښانه شي.

په ورته وخت کې د کډوالو او راستنېدونکو چارو وزیر په دغه کتنه کې د طالبانو د چارواکو د هڅو په ستایلو سره نوی نسل ته د زده کړو په برخه کې د اسانتیاوو پر چمتو کولو او د هغوی پر فکري روزنه ټینګار کړی دی.

جمهورخبري آژانس