نږدې ۱۰۰ مدني ټولنو، احتجاجي غورځنګونو او د بشري حقونو سازمانونو یوه اعلامیه خپره کړه چې د روسیې لخوا د طالبانو د ادارې په رسمي توګه په رسمیت پیژندلو پریکړه یې د ملیونونو افغانانو د ارادې او کړاوونو ته بې احترامي وبلله.

د جمهور اژانس د راپور له مخې، نږدې ۱۰۰ د بشري حقونو سازمانونو، مدني ټولنو غورځنګونو او احتجاجي غورځنګونو پرون یوه اعلامیه خپره کړه چې په کې یې په افغانستان کې د طالبانو د واکمنۍ په اړه د روسیې دریځ د ملیونونو افغانانو د ارادې او کړاوونو ته بې پامي وبلله.

په اعلامیه کې زیاته شوې چې طالبان د افغانستان د خلکو استازیتوب نه کوي او دا ډله پرته له کومې قانوني پروسې یا ټاکنو واک ته ورسېده.

په اعلامیه کې د طالبانو د واکمنۍ پرمهال د ښځو او نجونو وضعیت، په هیواد کې د خبریالانو، پخوانیو سرتیرو او امنیتي ځواکونو په وړاندې ګواښونو ته اشاره شوې او ویل شوي چې د روسیې دا اقدام تاوتریخوالي ته مشروعیت ورکوي او د عدالت اصل په بشپړه توګه له منځه وړي.

د مدني ټولنې سازمانونو او احتجاجي غورځنګونو هم د دې پریکړې پایلو ته اشاره کړې او ویلي یې دي چې دا اقدام احتمال لري چې نور هیوادونه وهڅوي چې له طالبانو سره اړیکې عادي کړي.

جمهورخبري آژانس