لوېدیځې رسنۍ باوري دي، چې امریکا به له طالبانو سره د سولې تر تړون وروسته هم افغانستان کې خپل استخباراتي کسان پرېږدي.
د
جمهور خبري آژانس د خبر له مخې فارن پالیسۍ ورځپاڼې لیکلي، چې د امریکا د استخباراتي ادارې سي آی اې به د طالبانو او واشتګټن له هوکړې وروسته هم افغانستان کې خپل استخباراتي او نیابتي مرکزونه فعال وساتي.
د سرچینې په وینا د امریکا استخباراتي چارواکو ورته ویلي، چې سي آی ای غواړي له سولې وروسته په افغانستان کې پیاوړی حضور ولري.
د یادونې ده، چې تر دې وړاندې د امریکا ولسمشر ډونالډ ټرمپ هم ویلي که څه هم سرتېري له افغانستانه باسي خو په وینا یې یوه قوي استخباراتي ډله به افغانستان کې پرېږدي.
بل خوا د ناټو سرمنشي یانس سټولټنبرګ له څرګندونو داسې ښکاري، چې امریکا او ناټو تر سولې وروسته هم افغانستان کې خپل حضور غواړي.
د ناټو سرمنشي هم ویلي، کېدای شي د سولې له یوې هوکړې وروسته هم په افغانستان کې د ناټو ځواکونو حضور ته شدیده اړتیا پېښه شي.
جمهورخبري آژانس:کابل