د افغانستان د ملي مصالحې عالي شورا غړي او مطبوعاتي مسوولین وايي، د ترکیې کنفرانس کې د ګډون کوونکو کسانو پر نوملړ بحثونه روان دي.
د
جمهور خبري آژانس د خبر له مخې دغه شورا زیاته کړې، چې دا مهال شورا د سیاسي ګوندونو له لوري د سولې د وړاندیز شویو طرحو پر توحید کار کوي.
د دغه شورا مطبوعاتي مسوولین زیاتوي، چې د دې تر څنګ د ترکیې په کنفرانسک ې د ګډون کوونکو کسانو پر نوملړ هم بحثونه روان دي، هم تر اوسه یې شمېر او نومونه نه دي په ډاګه شوي.
ملي مصالحې عالي شورا وایي، تمه لري چې د ترکیې په کنفرانس کې ټول اړخونه پر یوه دایمي اوربند سره سلا شي او د روانې جګړې ختمولو ته زمینه برابره شي.
دا په داسې حال کې ده، چې هلته په دوحه کې هم د ملګرو ملتونو د استازو، امریکایي، ترکي، قطري چارواکو او افغان حکومت او طالبانو د مرکچي پلاوی تر منځ د ترکیې د ناستې پر اجنډا خبرې روانې دي، خو تر اوسه یې پر اجندا او کره نېټه کومه موافقه نه ده کړې.
په ورته وخت کې ځینې سیاسیون وایي، که دوحه کې د ترکیې د ناستې په اړه کومه سمه پرېکړه او اجنډا ونه ټاکل شي، نو د ترکیې ناسته به هم بې ګټې وي.
جمهورخبري آژانس:کابل