ننګرهار کې یو دیني عالم وژل شوی او دو تنو مړي موندل شوي دي

سیمه ییزې سرچینې او ځايي خلک وايي، ننګرهار کې یو دیني عالم په ډزو وژل شوی او د دو تنو نورو جسدونه موندل شوي دي.

د جمهور خبري آژانس د خبر له مخې دیني عالم نن سه شنبې د لړم ۱۱ مه سهار وختي وژل شوی او د دوه تنو نورو مړي په ونو کې ځوړند موندل شوي.

ځايي سرچینې وايي، نامعلومه وسله والو د عبدالواحد په نوم یو دیني عالم چې د معیوبینو د جامع جومات ملا امام و د سهار لمانځه لپاره د اوداسه پر مهال ډزو وژلی دی.

د سرچینې په وینا بریدګر له سیمې په تېښته بریالي شوي او تر اوسه د دغه قتل مسوولیت چا نه دی اخیستی.

بل خوا د جلال آباد ښار د نهمې ناحیې اړوند سیمو کې د دوو تنو جسدونه موندل شوي، چې په ونه کې راځړول شوي وو.

د ځايي خلکو په وینا دا پېښه تېره شپه د جلال – آباد تورخم پر لویه لار د کاریز پله ته نېږدې رامنځ ته شوې ده.
 
تر اوسه د وژل شویو کسانو هویت نه دی معلوم او د وژلو مسوولیت یې هم چا نه دی اخیستی.

ځايي طالب چارواکو هم تر اوسه په دې اړه څه نه دي ویلي.

د یادونې ده، چې څو ورځې وړاندې هم په ننګرهار کې یو دیني عالم او د یوه جامع جومات ملا امام د ناپېژانده وسله والو کسانو له خوا په ډزو وژل شوی وو.

جمهورخبري آژانس:کابل