د خوړو نړيوال پروګرام وايي، تېر پنځه نیمې میاشتې یې په افغانستان کې له څه باندې اولس نیم ميليونه خلکو سره مرسته کړې ده.
د
جمهور خبري آژانس د خبر له مخې دغه ادارې پرون د غوايي ۲۵ مه یوه ټویټ کې ویلي، په افغانستان کې پر میلیونونو خلکو د خوراکي توکو مرستې او د اړتیا وړ لومړني توکي وېشل شوي دي.
تر دې مخکې د خوړو د نړیوال پروګرام د اسیا مرستیالې انتهیا ویب ویلي وو، چې په افغانستان کې بشري وضعیت او د خوراکي توکو کمښت ډېر د اندېښنې وړ دی.
د هغه په وینا اټکل کېږي چې د روان کال تر نومبر پورې به په افغانستان کې اتلس اعشاریه نهه میلیونه خلک له سختې لوږې سره مخ شي.
نوموړي ټينګاتر کړي چې د مرستندویه ادارو له خوا د خوراکي توکو او معیشت مرستې د اړمنو کسانو د ژغورنې یوه لار ده.
په همدې حال کې د ملګرو ملتونو د کډوالو عالي کمېشنرۍ وايي، سږ کال یې له پنځو میلیونو افغانانو سره، په ځانګړې توګه له زیانمنو ښځو سره چې د کورنیو مشري کوي، مرسته کړې ده.
د يادې ادارې له خوا په يوه ټويټ کې راغلي، چې سږ کال يې له دغو کورنيو سره د خوراکي توکو او نورو لومړنيو اړتياوو مرسته کړې ده.
جمهورخبري آژانس:کابل