د افغان کډوالو تنظیم باید په احتیاط او درناوي سره ترسره شي

د ایران ولسمشر د افغان کډوالو د تنظیم کولو اړتیا باندې ټینګار وکړ، ترڅو د دې کډوالو په منځ کې د هر ډول منفي ذهنیت رامنځته کېدو مخه ونیول شي.

د جمهور اژانس د خبر له مخې، د ایران د ولسمشرۍ د ویب پاڼې په حواله، ښاغلي پژشکیان په خپلو وروستیو څرګندونو کې، د نږدې ګاونډي په توګه د افغانستان سره د اړیکو اهمیت ته په اشارې سره وویل: «افغانان زموږ د وینې وروڼه او خویندې دي، چې په ورته ژبه خبرې کوي او ګډ تاریخ، مذهب، عقیده او کلتور لري.»

هغه زیاته کړه: «ماد کورنیو چارو وزیر ته ټینګار کړی چې د افغان کډوالو تنظیم باید په خورا احتیاط سره ترسره شي ترڅو، خدای مه کړه، د غفلت له امله د دوی په مینځ کې منفي ذهنیت رامینځته نشي.»

د افغانستان سره د همکارۍ پراخولو لپاره د خپل کلک ملاتړ په څرګندولو سره، د ایران ولسمشر وویل چې که اړین شرایط پوره شي، هغه چمتو دی چې دې هیواد ته سفر وکړي ترڅو په دوه اړخیزو اړیکو کې یوه نوې پاڼه پرانیزي.

دا څرګندونې په داسې وخت کې راځي چې په ایران کې د میلیونونو افغان کډوالو شتون او د هغوی د مدیریت پورې اړوند مسایل د دواړو هېوادونو ترمنځ د اړیکو په مهمو مسلو کې دي.

پزشکیان د افغان کډوالو د درناوي او وقار ساتلو پر اړتیا ټینګار وکړ او په دې برخه کې یې د انساني او مسؤلانه چلند غوښتنه وکړه.

هغه د دواړو هېوادونو ترمنځ په کلتوري او تاریخي مشترکاتو هم ټینګار وکړ او ویې ویل چې دا ژورې اړیکې د دوستانه اړیکو د پیاوړتیا لپاره یو پلیټ فارم برابروي.

جمهورخبري آژانس