د عزیزي ګروپ شرکتونو یو پلاوی د برېښنا تولید په موخه بامیان ته سفر وکړ

 د عزیزي ګروپ شرکتونو مالک میرویس عزیزي د دفتر مشر عزت الله نعمت د یوه پلاوي په مشرۍ بامیان ولایت ته سفر وکړ او په بامیان کې یې د طالبانو له والي عبدالله سرحدي سره وکتل او خبرې یې وکړې.

د جمهور خبري آژانس د خبر له مخې، د طالبانو د بامیان والي مطبوعاتي دفتر وویل نن پنشنبې (د زمري ۳۰ مه) په دې غونډه کې په بامیان ولایت کې د برېښنا تولید یوه لویه پروژه بحث شوه. د راپور له مخې، په هیواد کې د تولید شویو ټولو ۱۰۰۰۰ میګاواټو برېښنا څخه، ۸۰۰ میګاواټه به یې په بامیان کې تولید شي.

د عزیزي انرژۍ شرکت د پروژو مشر انجنیر کورکوت اوز ترکمان وویل چې دا پروژه د ۸۰۰ ملیون امریکایي ډالرو ارزښت لري او په دوو مرحلو کې به پلي شي، د بامیان د سیغان او کهمرد ولسوالیو د ډبرو سکرو سرچینو څخه کار اخیستل کیږي او د عزیزي انرژۍ شرکت لخوا به تمویل شي. هغه زیاته کړه چې دا پروژه به د بامیانو اوسیدونکو لپاره په زرګونو کاري فرصتونه برابر کړي.

د طالبانو د والي مطبوعاتي دفتر د بامیانو د طالبانو د والي عبدالله سرحدي له قوله ویلي چې: "د دې برېښنا تولید پروژې پلي کول د بامیانو د خلکو د اوږدې مودې غوښتنو څخه یوه ده، او د طالبانو سیمه ایز حکومت به د دې پروژې د بریالیتوب لپاره هر اړخیزه همکاري وکړي."

د عزیزي ګروپ پلاوی، د طالبانو د وزارتونو او د بامیانو د کانونو ریاست تخنیکي ټیمونو سره یوځای، به د سیغان او کهمرد د ډبرو سکرو کانونو څخه لیدنه وکړي ترڅو لومړنۍ سروې ترسره کړي او د استخراج ساحې ارزونه وکړي ترڅو د برېښنا تولید لومړني پړاوونه پیل کړي.

جمهورخبري آژانس