د قانون او پارلمان خلاف به هېڅ ډول جوړجاى نه کوو

د پاکستان لومړی وزیر نواز شریف وايي په هېواد کې د سیاسي کړکېچ د هواري له پاره به هېڅکله داسې جوړ جاړي ته غاړه

کېنږدي، چې پر قانون او پارلمان برلاسی وي.
د جمهور آژانس د خبر له مخې نواز شریف ویلي د پاکستان پارلمان د دوه سوه میلیونه وګړو منتخب پارلمان دی او د یو څو کسانو د شخصي غوښتونو له پاره باید د میلیونو انسانانو رایې ته سپک ونه کتل شي.
ښاغلي شریف زیاته کړې، که چېرې څو د پارلمان او قانون خلاف کار وکړي او یا هم د پارلمان او حکومت پر وړاندې د خنډ اچولو هڅه وکړي، نو ټول سیاسي ګوندونه به یې په ګډه مخنیوی وکړي.
نوموړي د ټولو سیاسي ګوندونو له خوا د عمران خان او طاهر القادري د هڅو د مخنیوي له پاره د ټولو ګوندونو د یو ځای کېدو خبر پر داسې مهال کوي، چې تر ده وړاندې د بلوچستان ایالات د پښتونخوا عوامي ګوند مشر محمود خان اڅکزي هم خبرداری ورکړی وو، چې که چېرې د پارلمان خلاف کوم اقدام واخستل شي نو ټول سیاسي ګوندونه به په ګډه د هغې د دفاع له پاره یوه جبهه جوړه کړي.
نواز شريف چې تېره ورځ یې د پاکستان ملي پارلمان غونډې ته وینا کوله وویل، چې په پاکستان کې به د ديموکراسۍ او د د قانون برلاسي دوام ولري هېڅوک دا حق نه لري، چې په دې کې خنډ رامنځته کړي.
خو په ورته وخت کې یې وویل چې نواز شریف ویلي « موږ ټول غواړو چې په هېواد کې انتخاباتي اصلاحات وشي، چې د همدې هدف لپاره مو له ټولو ګوندونو سره تر سلا مشورو وروسته يوه کومېټه جوړه کړې او پر کار يې پيل کړى.»
بل خوا د نواز شریف او د حکومت مخالفو عمران خان او طاهر القادري له نواز شريف سره هر ډول خبرې پای ته رسولې دي او له حکومت سره یې د خبرو اترو دروازې تړلې دي.
عمران خان خپلو زرګونو پلویانو ته د وینا پر مهال ویلي چې حکومت یې نورې ټولې غوښتنې منلې خو یوازې د نواز شریف د استعفا غوښتنه یې نه ده منلې، چې له امله یې دوی له خبرو بایکاټ کړی دی.
خان په خپلو خبرو کې ویلي« ترڅو نواز شريف استعفا ورنه کړي، موږ خپلو ډېرو غوښتنو وروسته شو، يواځې د نواز شريف استعفا غواړو، تر څو خپلواک کميسيون په خلاص مټ په تېرو انتخاباتو د درغليو څېړنه وکړي، او که شریف لرې نه شي، موږ له حکومت سره هر ډول خبرې اترې ځنډوو او خپل احتجاج ته دوام ورکوو.»
په ورته وخت کې د عوامي تحریک مشر طاهر القادري هم ویلي، چې له حکومت سره یې خبرې بې نتیجې پای ته رسېدلې او اوس له حکومت سره هېڅ ډول خبرې نه کوي.
هغه په خپلو خبرو کې ویليو چې نور دې هڅوک ده ته د خبرو له پاره د ورتلو تکلف نه ګالي او په خپلو پلویانو یې غږ وکړ، چې د انقلال له پاره چمتوالی ونیسي.
جمهور آژانس