عمران خان خپل لاریونونه د پاکستان نورو ښارونو ته هم غځوي

د پاکستان د تحریف انصاف ګوند مشر او د پاکستان د اوسني حکومت مخالف عمران خان اعلان وکړ، چې خپلې احتجاجي

غونډې او لاریونونه به د پاکستان نورو ښارونو ته هم وغځوي.
د جمهور آژانس د خبر له مخې عمران خان ویلي وروسته له دې به د پلازمېنې اسلام آباد سربېره په کراچۍ، ملتان، لاهور او فیصل آباد ښارونو کې هم لوی لوی لاریونونه په لار واچوي.
نوموړي تر هغه به خپلو لاریونو ته داوم ورکړي تر څو لومړي وزیر نواز شریف استعفا نه وي ورکړې او پارلمان منحل شوی نه وي.
د همدې غوښتو د پوره کېدو له پاره د عمران خان په مشرۍ د پاکستان تحريک انصاف او د طآهر القادري په مشرۍ د عوامي تحريک زرګونه پلويان دا مهال په اسلام اباد کې د پارلمان د ودانۍ مخې ته د احتجاج په توګه ناست دي.
که څه هم د جمعې په ورځ د جنرال راحيل شريف په غوښتنه د نواز شريف د حکومت او مخالف سياسي ګوند تحريک انصاف ترمنځ يو ځل بيا مذاکرات وشول، خو بې نتیجې پای ته ورسېدل.
تر دې خبرو اترو وروسته د تحريک انصاف ګوند جګپوړي چارواکي شاه محمود قريشي له رسنيو سره د خبرو پر مهال پر حکومت نيوکه وکړه، چې د رامنځته شوي سياسي کړکېچ د حل لپاره جدي اقدامات نه کوي.
هغه په خپلو خبرو کې وویل«موږ نن له دوى (حکومتي ټيم) نه وغوښتل، چې موږ له تاسو شپږ غوښتنې کړې وې، تاسو بايد د هغه په اړه موږ ته وضاحت راکړئ. که څه هم دوى زموږ ځينې غوښتنې مني، خو موږ به يواځې په هغه صورت کې له دوى سره مذاکرات وغځوو، چې دوى د مسئلې حل ته جدي پام واړوي او نواز شريف استعفا ورکړي.»
بل خوا د حکومت د مذاکراتي ټيم غړي او د پاکستان د ماليې وزير اسحاق ډار ویلي، چې حکومت يې د عمران خان ټولې غوښتنې منلي، خو د صدراعظم نواز شريف او د پنجاب ايالت د والي شهباز شهباز د استعفا غوښتنه د قانون خلاف ده او هېڅ جواز نه لري.
خو عمران خان او طاهرالقادري ویلي چې نواز شریف په تېرو ټاکنو کې درغلي کړې چې له امله یې دی او پارلمان په غیر قانوني توګه حکومت پر مخ وړي.
جمهور آژانس