لغمان کې دوه وزیرستاني وسله والو ته مرګ ژوبله واوښته

چارواکي وايي وسله والو طالبانو په لغمان ولایت کې د سیمه ییزو پولیسو پر امنیتي پوسته برید کړی، چې د پولیسو په ځوابیه برید کې یو وزیرستانۍ طالب وژل شوی او بل ټپي دی.
د جمهور آژانس د خبر له مخې وسله والو تېره شپه د لغمان ولایت د الیشنګ ولسوالۍ په اسلام آباد سیمه کې د سیمه ییزو پولیسو پر پوستې وسله وال برید کړی.
د لغمان د والي ویاند سرحدي ځواک جمهور آژانس ته وویل چې د وسله والو په دغه برید کې یو سیمه ییز پولیس وژل شوی دی.
د ده په خبره چې د پولیسو په ځوابیه برید کې یو وزیرستانی طالب وژل شوی او بل یې ټپي شوی دی.
نوموړی وايي دغه وزیرستاني طالبانو په سیمه کې د غلام الرحمن چې په مشهور په بلال دی تر قوماندې لاندې وسله وال فعالیتونه کول.
باید وویل شي چې څو ورځې وړاندې هم په الیشنګ ولسوالۍ کې د سیمه ییزو پولیسو او وسله والو طالبانو تر منځ نښته کې دواړو لورو ته مرګ ژوبله اوښتې وه.
جمهور آژانس
معروف سادات: ننګرهار