د سارک سازمان د ځینو مشرانو د ویناو لنډ ټکي

د سارک سازمان هېوادو مشرانو په خپله اتلسمه غونډه کې یو پر بل پسې په سیمه کې د اقتصادي پیاوړتیا او د سولې او امنیت د ټنګښت په اړه خبرې وکړې.
د جمهور آژآنس د خبر له مخې دغه غونډه

نن د نیپال هېواد په پلازمېنه کتمانډو کې پیل شوه، چې کوربه توب یې د نیپال د صدراعظم پر غاړی دی او دوه ورځې به دوام وکړي.
دغه غونډې ته افغان ولسمشر غني په خپلو خبرو کې وویل، چې په سویلي اسیا کې روان تاوتریخوالی ورته د منلو نه دی او د دغه سازمان غړي هېوادونه باید په ګډه دغه ستونزو ته حل لارې ولټوي.
ولسمشر غني په خپلو خبرو کې وویل، چې هیڅ هېواد ته به په افغانستان کې د جګړې د پلانولو اجازه ورنه کړي او زیاته یې کړه، چې د افغانستان خاوره به د هیڅ کوم هېواد په زیان نه کاریږي.
ښاغلي غني د پکتیکا د خونړۍ پېښې څخه هم یادونه وکړه او ویې ویل، چې افغان حکومت سولې ته ژمن دی او هېواد به یې د ښې حکومتدارۍ په برخه کار کوي او شفافیت به رامنځ ته کوي.
ولسمشر غني په سیمه کې اقتصادي وده هم مهمه وبلله او زیاته یې کړه، چې د اقتصاد پیاوړتیا ته زمینه برابره شوې، خو باید حکومتونه په دې برخه کې صادقانه همکاري وکړي.
ولسمشرغني په دې برخه کې د کاسا یک هزار، پروژې یادونه وکړه، چې له مرکزي اسیا نه بریښنا پاکستان ته را انتقالوي.
د پاکستان صدراعظم نوازشریف د سارک اتلسمې سرمشریزې ته د وینا پر مهال و ویل، چې د سیمې هېوادونه باید یو د بل په وړاندې له مخالفته لاس واخلي او په ګډه د بې وزلۍ، فساد او تروریزم مخنیوي ته کار وکړي.
زیاته کړه، دا چې د سارک په غونډه کې د جنوبي اسیا د هېوادونو بیرغونه یو ځای رپیږي، دا د دې څرګندويي کوي، چې د دې هېوادونو ترمنځ د همکارۍ ګډه فضا رامنځ ته شوې او زیاته یې کړه، چې هېواد یي چمتو دی، چې د سارک د نولسمې غونډې مشري وکړي.
د هند صدراعظم نریندرا مودي، غونډې ته د وینا پر مهال ډاډ ورکړ، چې هېواد به یی د جنوبي اسیا د هېوادونو ترمنځ د همکارۍ د فضا په برابرولو کې ونډه واخلي.
مودي وویل، هېواد به یې د جنوبي اسیا هېوادونو ته د صنعت او سوداګرۍ په برخه کې اسانتیاوې رامنځ ته کړي او په وینا یې د جنوبي اسیا هېوادونه د همکارۍ له اړخه د یووالي خواته روان دي.
د سریلانکا ولسمشر مهندا راجاپکسا و ویل، چې تروریزم د سیمې او هم د هېوادونو په کچه د یوه ګواښ په توګه پاته دی او باید په وړاندې یې مبارزه وشي.
باید وویل شي، چې د سارک په سازمان کې دا مهال د جنوبي اسیا اته هېوادونه افغانستان، پاکستان، هند، نیپال، بنګله دیش، سریلانکا، بوتان او مالدیف غړیتوب لری او چین، امریکا، اسرالیا، اروپايي ټولنه، جاپان، ایران، او برما د دغه سازمان څارونکي دي.
جمهور آژانس: کابل