خوښ یو چې امریکا له افغانستانه جنګي ځواکونه ایستلي دی

د امریکا متحده ایالاتو ولسمشر بارک اوباما وايي، خوښ دی، چې امریکا له افغانستانه جنګي ځواکونه ایستلي، خو په وینا یې لا هم یو شمېر ځواکونه شته چې په افغانستان کې خدمت کوي.
د جمهور آژآنس د خبر له مخې اوباما دغه څرګندونې تېره ورځ د واشنګټن په لمنه کې د ارلینګټن ملي هدیره، چې جنګي سرتېري په کې خښ دي، په یاد غونډه کې وکړه.
اوباما دغه هدیرې ته ورغی او د وژل شویو پوځیانو درناوی یې وکړ، چې دا په تېره یوه لسیزه کې لومړنۍ یاد ورځ ده، چې له امریکايي پوځیانو کېږي.
نوموړي په دغه یاد غونډه کې په دې یې خوښي څرګنده کړه چې امریکا له افغانستانه جنګي ځواکونه ایستلي او نور امریکايي پوځیان په کومه جګړه کې ښکېل نه دي.
هغه وویل« لا هم امریکايي پوځیان د خطرونو په وړاندې ځیر او تیارسی دی، لا هم خدمت کوي او لا هم د نړۍ په ګوټ ګوټ کې قربانۍ ورکوي، څو کاله پخوا موږ په افغانستان کې تر یو لک زیات سرتېري لرل. موږ د پاتې عسکرو د راوستلو لړۍ ته لا هم دوام ورکوو او د راتلونکي کال تر پایه یوازې دومره پوځیان پرېږدو چې زموږ د سفارت ساتنه وکړي، خو افغانستان لا هم خطرناک ځای دی،لکه څرنګه چې ډېرې کورنۍ پوهېږي، زموږ پوځیانو خپل ژوند زموږ لپاره په خطر کې اچولی دی.»
اوباما د خپلې وینا په ترڅ کې په افغانستان کې وروستني دوه وژل شوي امریکايي پوځیان، د پوځ متخصص وېټ مارتین او لومړی بریدمن رومن موریس وستایل او په ارلینګټن هدیره کې یې د بې نومه سرتېري پر څلي د ګلونو ګېډۍ کېښوده.
ده په خپلو خبرو کې زیاته کړه«د یادې ورځې مراسم هغو ټولو امریکایانو ته د درناوی پخاطر ترسره کیږي چې په پوځي یونیوفورم کې یې ځانونه قربان کړي دي. په تېره بیا نن موږ د هغو ټولو کسانو یاد ته درناوی کوو چې د افغانستان په جګړه کې وژل شوي دي، موږ په یاد لرو چې په څوارلسو کلونو کې له ۲۳۰۰ څخه زیات امریکایي سرتیري او د دې هېواد د پلي سمندري او هوایي ځواکونو غړي وژل شوي دي، موږ دغه راز د اییتلافي ځواکونو د ۱۱۰۰ سرتېرو قرباني هم په یاد لرو چې په دې جګړه کې یې خپل ژوند له لاسه ورکړی دی. د وی د یوه ګډ هدف لپاره چې افغانستان له امن اوثبات څخه برخمن شي او هم خپل هېوادونه مصون کړو.»
جمهورآژآنس:کابل