د لويو پروګرامونو په پلي کيدو سره به ګڼې ستونزې حل شي

د ملي یووالي حکومت اجرائیه رییس ډاکتر عبدالله عبدالله وايي، حکومت متوازن پرمختګ ته ژمن دی او د لویو پروګرامونو په پلي کېدو سره به ګڼې ستونزې او مشکلات حل شي.
د جمهور آژآنس د خبر له مخې ښاغلي عبدالله دغه څرګندونې تېره ورځ په سپېدار ماڼۍ کې د کندهار او هلمند ولایتونو د ولایتي شورا، مدني ټولنو او قومي مشرانو له استازو سره په کتنه کې کړې دي.
دغه استازو لومړی د هغو ولایتونو خلکو د روان سیاسي وضعیت، امنیتي حالاتو، بې کارۍ، اقتصادي وضعي، د لویو لارو جوړوني، د برېښنايي تذکرو د وېش لړۍ د پیل او تعلیم او ځوانانو په اړه خپلي اندېښنې او غوښتني له اجرائیه رئیس سره شریکي کړې.
دوی له ښاغلي عبدالله وغوښتل، چي د سهیلي ولایتونو د امنیتي حالت تر څنګ دي هلته په لیري پرتو ولسوالیو او ساحو کي تعلیمي وضعیت او د کار موندني فرصتونو ته لازمه توجه وکړي.
ښاغلي عبدالله دغه استازو او مشرانو ته د روان سیاسي وضعیت په اړه وویل، چې افغانستان د تیرو ولسمشریزو ټاکنو وروسته یو داسې حالت ته رسېدلی و، چې د اوسني حکومت پرته بله لار یې د ستونزې حل نشوای کېدای.
ده ویلي، چې حکومت له څو لویو ستونزو سره مخامخ دی، چې په تدریجي توګه به هر یوې ته توجه کوي او حالت به مثبت لوري ته پرمختګ کوي.
نوموړی وايي، حکومت د اوسنیو ستونزو د لمنځه وړلو له پاره څو لوی پروګرامونه لري، چې په تطبیق سره به یې امنیت ترڅنګ د بې کارۍ ستونزه هم رفع او اقتصادي وضعیت به مو ښه شي.
ډاکترعبدالله زیاته کړې، چې د ملي یووالي حکومت متوازن پرمختګ ته ژمن دی او ډېر تمرکز یې پر هغو ساحو دی، چي تېر کلونه پکښي زیات کار نه دی سوی.
اجرائیه رییس وايي د برېښنايي تذکرو د وېش پیل هیڅ راز قانوني او عملي ستونزه نه لري او حکومت به ډېر ژر دې برخه کي هم عملي اقدام وکړي.
جمهور آژآنس:کابل