طیب آغا له طالبانو غوښتي، چې افغانستان ته ستانه شي

په قطر کې د طالبانو د سیاسي دفتر مشر سید طیب آغا له خپلې استعفا سره سم له طالبانو غوښتي، چې افغانستان ته ستانه او هلته خپلې مهمې پرېکړې په ازاد ډول وکړي.
د جمهور آژآنس د خبر له مخې د طیب اغا د استعفی خبرې څو ورځې وړاندې رسنیو ته راووتې، خو وروسته د طالبانو له خوا رد شوې.
اوس طیب آغا په یوه خبرپانه کې چې رسنیو ته یې لېږلې ویلي، چې له خپلې دندې یې استعفی کړې او وروسته له دې به د افغانانو سره د یوه عادي وګړي په توګه ګوري نه د طالبانو د یوه مشر.
طیب آغا د خپل مشر ملا عمر د مړینې د پټولو په اعتراض کې له خپلې دندې استعفی کړې او ویلي یې دي، چې دوه نیم کاله د طالبانو د مخکیني مشر ملا محمد عمر د مړینې خبر پټول یوه تاریخي تېروتنه ده، او د پاکستان له لارې پر خبرو هوکړې ددغه خبر په لوڅولو کې مهم رول ولوباوه.
هغه دا هم ویلي، چې دا یو لویه تېروتنه وه چې د ملا عمر پیغام یوازې یو څو محدودو کسانو ته رسېده او د دې غورځنګ نورو غړو ته به نه رسېد.
نوموړي په دغه خبرپاڼه کې ویلي، چې په بهر کې د طالبانو د نوي مشر ټاکل لویه تېروتنه ده او پر دې موضوع د دې غورځنګ د ټولو غړو موافقه نشته.
نوموړي لیکلي«د نوي مشر په توګه د ملا اختر محمد منصور ټاکل یوه لویه تېروتنه ده؛ ځکه چې بهر کې د مشرانو هر راز ټاکل کېدو افغان ولس له ناوړه پایلو سره مخامخ کړی.»
ښاغلی طیب اغا دا موضوع د شوروي له نیواک وروسته په مسکو کې د افغانستان لپاره د مشر ټاکل، بیا وروسته په ایران او پاکستان کي د مجاهدینو د مشرانو ټاکل او د امریکا د نیواک وروسته په بن کې د افغان مشرانو ټاکلو ته ورته ګڼلې ده.
طیب آغا له طالبانو له غورځنګه غوښتي، چې افغانستان ته ستانه شي او هلته خپلې مهمې پرېکړې وکړي، ځکه چې په وینا یې هلته په آزاد ډول خپل نوی مشر ټاکل شی.
طیب آغا په خبرپاڼه کې ویلي، چې نور به د طالبانو له خوا په نیول کېدونکو پرېکړو او کړو وړو کې ښکېل نه وي او زیاتوي«په اوسنیو لانجمنو شرایطو کې زه د هېڅ کومې غاړې ملاتړ نه کوم. اوس د طالبانو په اړوند داسې هڅې روانې دي چې دوی په یوه تلک کې راګیر شي، له دې دسیسې د وتلو یوازېنۍ لار دا ده چې ټولې اړوندې غاړې د ازادۍ ساتلو لپاره د خپل مشر قربانیو ته درناوی وکړي او د سلګونو زرو کسانو د قربانیو ثمره ترلاسه کړي.»
د طالبانو د سیاسي دفتر دغه مشر د جګړې په ډګر کې له طالب قومندانانو او جنګیالیو د یووالي او خپلواکۍ او د خلکو د ژوند او شتمنیو د ساتلو غوښتنه کړې او ویلي یې دي، چې طالبان باید د بهرنیانو د ګټو له پاره ونه کارول شي.
نوموړي پر هغو هېوادونو او غاړو د بریدونو نه کولو غوښتنه هم کړې ده، چې د افغانستان په بیارغونه او د دغه هېواد د بې وزله ولس په لاسنیوي کې برخه لري.
جمهور آژآنس:کابل