ننګرهار او پکتیکا کې د داعش او طالبانو جګړې شوې

سیمه ییز چارواکي وايي، په ننګرهار او پکتیکا ولایتونو کې د وسله والو طالبانو او داعش وسله والو تر منځ ستختې جګړې شوې، چې دواړو لورو ته په کې درنده مرګ ژوبله اوښتې.
د جمهور آژانس د خبر له مخې د ننګرهار ولایت په اچین ولسوالۍ کې تېره ورځ سهار د طالبانو او داعش تر منځ جګړه شوې، چې د چارواکو په خبره څلور داعش وسله وال په کې وژل شوي دي.
په ورته وخت کې د پکتیکا چارواکي وايي، د دغه ولایت په ګومل ولسوالۍ کې د تېرې چهارشنبې له ورځې راهیسې د طالبانو او داعش تر منځ جګړه روانه ده.
د ګومل ولسوال شایسته خان زیاتوي، چې دغه جګړه د یادې ولسوالۍ د دینار خېلو په سیمه کې روانه ده، چې تر اوسه په کې د هنر، فرید او توفان په نومونو د داعش درې مهم قوماندانان وژل شوي دي.
نوموړي زیاته کړه، چې په دې جګړه کې دوه طالبان هم وژل شوي او یو شمېر کسان له دواړو لورو ټپیان شوي هم دي.
دی د هنر نومي داعش قوماندان په اړه وايي، چې دغه قوماندان تر دې وړاندې د طالبانو مشهور قوماندان و، چې درې میاشتې وړاندې داعش ډلې سره یو ځای شوی دی.
د هغه په وینا قوماندان هنر په دې وروستیو کې له قوماندان فرید او قوماندان توپان سره یو ځای دېنار خېلو سیمو ته راغلی و او غوښتل یې دلته د داعش دفترونه جوړي، چې طالبانو پرې حملې پیل کړې.
د ګومل ولسوال ویلي، چې جګړه د سې شنبې پر ورځ په شدت روانه وه، خو د چارشنبې پر ورځ دوی یو بل ته په مورچو کې ناست وو.
دا په داسي حال کې ده چې د پکتیکا خلکو او د ولایتي شورا غړیو په خپل ولایت کې د داعش د فعالیت پر زیاتېدو اندېښنه ښکاروي او وايي داعش په دغه ولایت کې ښکاره فعالیت پیل کړی.
جمهورآژانس:پکتیکا