سرپرست وزارت خارجه افغانستان با رئیس جمهور تاجیکستان دیدار کرد

محمدحنیف اتمر سرپرست وزارت امور خارجهٔ جمهوری اسلامی افغانستان با امام‌‌علی رحمان رئیس جمهوری تاجیکستان دیدار و گفتگو کرد.

به گزارش خبرگزاری جمهور؛ وزارت امور خارجه گفته که در این دیدار، رئیس جمهور تاجیکستان آغاز مذاکرات صلح افغانستان را برای وزیر خارجه و مردم افغانستان تبریک گفت.‌

آقای امام‌علی رحمان، ضمن ابراز امیدواری در مورد موفقیت مذاکرات صلح، از پشتیبانی دولت تاجیکستان از روند صلح و موقف اصولی جمهوری اسلامی افغانستان، به وزیر امور خارجهٔ کشور اطمینان داد.

سرپرست وزارت امور خارجه از حمایت‌های همیشه‌گی دولت و مردم تاجیکستان ابراز قدردانی کرد.

همچنان، آقای اتمر در مورد برنامه رئیس جمهوری اسلامی افغانستان که قرار است در آیندهٔ نزدیک به تاجیکستان سفر کند، به رئيس جمهور تاجیکستان معلومات داد.

 امام علی رحمان ضمن تأکید بر توسعهٔ روابط دو کشور در عرصه‌های اقتصادی، تجارتی و علمی-فرهنگی، همکاری با افغانستان را از اولویت‌های سیاست خارجی جمهوری تاجیکستان شمرد. با اشاره به تقویت جایگاه افغانستان در منطقه، رییس‌جمهور رحمان تأیید کرد که تعقیب پروژه‌های زیربنایی از جمله انتقال انرژی برق عامل جذب افغانستان در روند همکاری‌های منطقه‌یی می‌باشد.

 آقای رحمان همچنان گفت که ملت تاجیکستان همیشه از موقف دولت جمهوری اسلامی افغانستان در تأمین امنیت و صلح پایدار پشتیبانی نموده و در راستای حل مشکلات سعی و تلاش کرده است.

در ادامه، دو جانب در پیوند به تطبیق پروژه‌های زیربنایی، توسعهٔ تجارت و ترانزیت، انتقال انرژی، مبارزه با تروریزم و تندروی، مهار جرایم سازمان‌یافته، تحکیم همکاری‌های سرحدی، گسترش دادوستد فرهنگی و آموزش کادرهای مسلکی افغانستان صحبت‌های مفصل داشتند.

 آقای اتمر با تأکید بر پیوندهای عمیق تاریخی و فرهنگی میان دو کشور، خواهان گسترش روابط دوجانبه به سطح همکاری‌های استراتیژیک شد.

در همین حال وزارت امور خارجه گفته که آقای اتمر در ادامهٔ دیدارهایش با مقامات تاجیکستانی، با دبیر شورای امنیت ملی تاجیکستان آقای نصرالله محمودزاده ملاقات کرد.

در این دیدار، آقای اتمر از حمایت تاجیکستان از موقف جمهوری اسلامی افغانستان در روند صلح و مذاکرات با طالبان قدردانی کرد و همکاری دو کشور را در مبارزه با تروریزم، تأمین امنیت سرحدات و جلوگیری از قاچاق مواد مخدر مهم و اساسی خواند.

سپس آقای محمودزاده بر اهمیت گسترش تلاش‌های دوجانبه برای مبارزه با تروریزم و امنیت سرحدات، تأکید کرد و آمادگی تاجیکستان را برای همکاری با افغانستان در بخش‌های یادشده اعلام کرد.

همچنین، دو طرف در خصوص استرداد محبوسین، ایجاد کمیسیون همکاری‌های امنیتی میان دو کشور و ایجاد راهکار جامع و موثر منطقه‌‌یی برای مبارزه با تروریزم، بحث و تبادل نظر کردند.

گفتنی است که محمدحنیف اتمر، سرپرست وزارت امور خارجه کشور، صبح روز پنجشنبه (27 سنبله) در راس یک هیات بلندپایه دولتی عازم تاجیکستان شد.

بحث‌ و مذاکره روی تقویت هرچه بیش‌تر روابط دو کشور در بخش‌های امنیتی و مرزی، ترانسپورت، سرمایه‌گذاری، تجارت، ترانزیت و انرژی از اهداف این سفر خوانده شده است.

خبرگزاری جمهور- کابل