۰

داکتر عبدالله برای رایزنی درباره صلح افغانستان عازم اسلام‌آباد شد

دوشنبه ۷ میزان ۱۳۹۹ ساعت ۰۷:۴۷
داکتر عبدالله عبدالله رئیس شورای مصالحۀ ملی کشور، صبح امروز دوشنبه (7 میزان) برای رایزنی درباره صلح افغانستان عازم اسلام‌آباد پایتخت پاکستان شد.
داکتر عبدالله برای رایزنی درباره صلح افغانستان عازم اسلام‌آباد شد
داکتر عبدالله عبدالله رئیس شورای مصالحۀ ملی کشور، صبح امروز دوشنبه (7 میزان) برای رایزنی درباره صلح افغانستان عازم اسلام‌آباد پایتخت پاکستان شد.

به گزارش خبرگزاری جمهور؛ دفتر مطبوعاتی شورای عالی مصالحۀ ملی گفته که آقای عبدالله به دعوت رسمی عمران‌خان صدراعظم جمهوری پاکستان در رأس یک هیأت بلندپایهٔ جمهوری اسلامی افغانستان عازم اسلام‌آباد شده است.

در این سفر، رئیس شورای عالی مصالحهٔ ملی در پیوند به تلاش‌های صلح پایدار، با عزت و عادلانه در افغانستان با رهبران ارشد جمهوری اسلامی پاکستان بحث و تبادل نظر می‌کند.

داکتر عبدالله در جریان اقامت خود در جمهوری اسلامی پاکستان با دکتور عارف علوی رئیس‌جمهور،  عمران‌خان صدراعظم، اسد قیصر رئیس مجلس نمایندگان، محمد صادق سنجرانی رئیس مجلس سنا، شاه‌محمود قریشی وزیر امورخارجه، جنرال قمر جاوید باجوه رئیس ستاد ارتش و سایر مقامات این کشور ملاقات می‎‌کند.

رییس شورای عالی مصالحهٔ ملی را در سفر به جمهوری اسلامی پاکستان معاونان شورای عالی مصالحهٔ ملی، مشاوران و تعدادی از شخصیت‌های سیاسی کشور همراهی می‌کنند.

رییس شورای عالی مصالحهٔ ملی قبل از سفر به اسلام‌آباد گفت:"در سفر به اسلام آباد با رهبران و مقامات عالی رتبهٔ جمهوری اسلامی پاکستان در بارهٔ تلاش‌های صلح صحبت می‌کنیم. امیدواریم با سفر به اسلام آباد فصل تازه‌ای از همکاری‌های مشترک میان دو کشور در عرصه‌های مختلف به ویژه برقراری صلح پایدار و با عزت باز گردد".

گفتنی است که  این نخستین سفر داکتر عبدالله در یک دهۀ اخیر به جمهوری اسلامی پاکستان می‌باشد.
این در حالی است که با آغاز مذاکرات صلح میان دولت جمهوری اسلامی افغانستان و گروه طالبان؛ حکومت افغانستان تلاش دارد تا اسلام‌آّباد را متقاعد به همکاری صادقانه در روند صلح بسازد.

دو روز پیش، محمداشرف غنی، رئیس جمهور کشور در صحبت تلفنی، عمران خان، نخست وزیر پاکستان را برای دیدار از کابل دعوت کرد.

خبرگزاری جمهور- کابل
 
 
نام شما

آدرس ايميل شما
نظر شما *

پربازدیدترین