دیدار داکتر عبدالله با امام علی رحمان؛ تاجیکستان از تلاش‌های صلح افغانستان حمایت می‌کند

داکتر عبدالله عبدالله رییس شورای عالی مصالحۀ ملی با  امام علی رحمان رییس جمهور تاجیکستان ملاقات و درباره پروسه صلح افغانستان گفتگو کرد.

به گزارش خبرگزاری جمهور؛ امام علی رحمان در این دیدار که امروز سه‌شنبه (2 جدی) انجام شد، ابراز امیدواری نمود که تلاش‌های صلح در افغانستان به پیروزی برسد.

رییس جمهور تاجیکستان، افغانستان را از دوستان و متحدان نزدیک تاجیکستان خواند و تاکید نمود که این روابط ریشه در همسایگی، مشترکات تاریخی، فرهنگی و دینی دارد.

امام علی رحمان با اعلان حمایت همه جانبۀ جمهوری تاجیکستان از تلاش‌های صلح در افغانستان، صلح و ثبات در افغانستان را صلح و ثبات در تاجیکستان، منطقه و فراتر از منطقه خواند.

 رییس جمهور تاجیکستان در ادامه‌ی صحبت‌های خود افزود که افغانستان، تاجیکستان و منطقه از دهشت‌افگنی، افراط‌گرایی و بی‌ثباتی متضرر شده‌اند و صلح و ثبات در افغانستان زمینه‌ی گسترش و توسعه‌ی تجارت و ترانزیت میان دو کشور، منطقه و اتصال آسیای مرکزی به جنوب آسیا را فراهم می‌سازد.

رییس جمهور تاجیکستان در بخش دیگر از صحبت‌های خود گفت که تاجیکستان دوست و متحد افغانستان است و از تلاش‌های صلح در افغانستان و تصمیم جمهوری اسلامی و مردم افغانستان در این عرصه حمایت می‌کند.

داکتر عبدالله نیز گفت که روابط و دوستی میان دو کشور بر ارزش‌ها و مشترکات تاریخی، فرهنگی و دینی دیرینه استوار است و از حمایت و همکاری‌های شما از داعیۀ برحق مردم افغانستان در دوره‌های مختلف سپاس‌گزاریم.

وی در بخش دیگر از صحبت‌های خود دربارۀ تلاش‌های صلح، مذاکرات دوحه، دور بعدی مذاکرات، سفرهای اخیر برای کسب اجماع منطقه‌ای و نقش جمهوری تاجیکستان در تأمین صلح در افغانستان صحبت نمود.

 رییس شورای عالی مصالحۀ ملی در صحبت‌های خود تأکید کرد که جمهوری اسلامی افغانستان در مذاکرات صلح به دست‌یافتن به صلح پایدار، عادلانه، باعزت و با حفظ ارزش‌های جمهوریت متعهد می‌باشد.

داکتر عبدالله در بخش دیگر از صحبت‌های خود از افزایش خشونت و جنگ به عنوان یکی از نگرانی‌های حکومت و مردم افغانستان در این مرحله نام برد و بر ختم جنگ و قطع‌ خون‌ریزی در جریان مذاکرات تأکید نمود.

رییس شورای عالی مصالحۀ ملی با قدردانی از حمایت‌های همیشگی امام علی رحمان رییس جمهور تاجیکستان از تلاش‌های صلح، خواهان ادامه این همکاری‌ها گردید و تأکید نمود که افغانستان می‌تواند از تجربۀ صلح و آشتی ملی در تاجیکستان استفاده نماید.

گفتنی است که داکتر عبدالله روز گذشته در راس یک هیات بلندپایه دولتی وارد دوشنبه پایتخت تاجیکستان شد.

در این سفر رییس شورای عالی مصالحۀ ملی با  امام‌علی‌رحمن رییس جمهور، جناب قاهر رسول‌زاده صدراعظم، جناب محمد طاهر ذاکرزاده رییس مجلس نمایندگان و جناب سراج‌الدین مهرالدین وزیر امور خارجه‌ی جمهوری تاجیکستان دیدار و در پیوند به روند صلح افغانستان و چالش‌ها و فرصت‌های پیش رو گفتگو کرده است.

پیش از این، داکتر عبدالله به هدف جلب حمایت کشورهای منطقه از روند صلح افغانستان، به کشورهای پاکستان، ایران، هند، ازبیکستان و ترکیه سفر نمود و با رهبران این کشورها دربارۀ تلاش‌های صلح دیدار کرد.

خبرگزاری جمهور- کابل