رسانههای تاجیکستانی از آغاز دومین روز رزمایش نظامی کشورهای عضو پیمان امنیت جمعی در نزدیکی مرز با افغانستان خبر داده اند.
به گزارش
خبرگزاری جمهور؛ این رزمایش دیروز دوشنبه (26 میزان) آغاز شد و برای شش روز دیگر دوام خواهد کرد. امروز سه شنبه دومین روز این رزمایش نظامی است.
وزارتهای دفاع روسیه و تاجیکستان اعلام کرده اند که این تمرینات توسط اعضای سازمان امنیت جمعی راه اندازی شده که 5هزار سرباز و دهها، چرخبال و تانک اشتراک دارند.
کشورهای روسیه، تاجیکستان، قرقیزستان، قزاقستان، ارمنستان و بلاروس عضو پیمان امنیت جمعی هستند.
این رزمایش نظامی به درخواست تاجیکستان که طولانی ترین مرز با افغانستان را دارد، در حال برگزاری است.
پس از به قدرت رسیدن طالبان در افغانستان، امام علی رحمان رییس جمهور تاجیکستان از امنیت مرزهای خود با افغانستان ابراز نگرانی کرده و در این اواخر تنشها میان کابل و دوشنبه افزایش یافته است.
طالبان تاجیکستان را به مداخله کردن در امور داخلی افغانستان متهم کرده است.
از سوی دیگر، چند روز پیش ولادیمیر پوتین رییس جمهور روسیه به شدت از احتمال نفود گروههای تندرو به کشورهای آسیایی میانه ابراز نگرانی کرد و گفت که گروه های تروریستی در افغانستان در پی ترویج جنگ مذهبی اند.
پوتین خاطر نشان کرد که داعش، جنبش اسلامی ازبکستان، جماعت انصارالله تاجیکستان، القاعده و تعداد دیگری در مرزهای افغانستان با کشورهای آسیای میانه حضور دارند.
او تاکید کرده که این گروهها برای ترویج درگیریهای قومی و مذهبی تلاش میکنند.
این نگرانی در حالی مطرح می شود که طالبان پیش از این گفته که داعش در افغانستان جایگاه ندارد و آنان توان مقابله با این گروه را دارد.
خبرگزاری جمهور- کابل