جاپان در راستای کنترل بیماری‌های ساری با گروه طالبان همکاری می‌کند
دوشنبه ۲۶ سنبله ۱۴۰۳ ساعت ۱۸:۳۷
وزارت صحت عامه گروه طالبان اعلام کرده که جاپان در راستای کنترل بیماری‌های ساری با این گروه همکاری می‌کند.
وزارت صحت عامه گروه طالبان امروز دوشنبه (26سنبله) اعلام کرد، مولوی نور جلال جلالی سرپرست پاکستانی‌تبار این وزارت با کورومیا تاکایوشی سفیر کشور جاپان در کابل دیدار گرده است.
دو طرف روی کمک‌های جاپان در بخش صحی به ویژه تداوی معتادان مواد مخدر، واکسیناسیون، کنترل امراض ساری و همکاری‌های دوامدار جاپان و گروه طالبان در بخش صحی صحبت کردند.
مولوی نور جلال جلالی سرپرست پاکستانی‌تبار صحت‌عامه گروه طالبان، همکاری کشور جاپان در سکتور صحی را ضروری خواند و در مورد همکاری‌های دوامدار این کشور تاکید کرده است.
سفیر جاپان از همکاری و مساعدت کامل در زمینه تداوی معتادان، واکسیناسیون و کنترل امراض ساری اطمینان داده و افزوده که ما متعهد هستیم که در آینده نزدیک در این راستا با وزارت صحت‌عامه افغانستان همکاری کنیم.
کد مطلب: 175641
